لاہور: لاہور الیکٹرک سپلائی کمپنی (لیسکو) نے ترسیلی نظام کی مرمت اور ترقیاتی کاموں کے باعث 4 اور 5 جولائی کو شہر کے مختلف علاقوں میں بجلی کی عارضی بندش کا شیڈول جاری کر دیا ہے۔
لیسکو کے مطابق انفراسٹرکچر کی اپ گریڈیشن اور ضروری مرمتی کاموں کے دوران مختلف فیڈرز سے بجلی کی فراہمی کئی گھنٹوں کے لیے معطل رہے گی تاکہ کام محفوظ اور مؤثر انداز میں مکمل کیا جا سکے۔
جاری کردہ شیڈول کے مطابق 4 جولائی کو بعض علاقوں میں صبح 8 بجے سے دوپہر 2 بجے تک بجلی بند رہے گی، جبکہ 5 جولائی کے لیے بھی فیڈر وار الگ اوقات مقرر کیے گئے ہیں، جن کے تحت مختلف علاقوں میں بجلی کی فراہمی عارضی طور پر معطل کی جائے گی۔
لیسکو انتظامیہ کا کہنا ہے کہ بجلی کے نظام کو مزید مستحکم اور قابلِ اعتماد بنانے، مستقبل میں ٹرپنگ اور فنی خرابیوں سے بچنے کے لیے یہ عارضی بندش ناگزیر ہے۔
کمپنی نے صارفین کو ہدایت کی ہے کہ وہ لیسکو کی جانب سے جاری کردہ تفصیلی فیڈر شیڈول میں اپنے علاقے کی معلومات ضرور چیک کریں اور بجلی کی بندش کے پیش نظر اپنے روزمرہ کے امور پہلے سے ترتیب دے لیں تاکہ کسی قسم کی دشواری کا سامنا نہ کرنا پڑے۔
تازہ ترین خبروں کے لیے پی این آئی کا فیس بک پیج فالو کریں
