عالمی مارکیٹ میں سونے کی قیمت میں کمی دیکھنے میں آئی ہے۔ سرمایہ کاروں کی جانب سے حالیہ تیزی کے بعد منافع سمیٹنے کے باعث سونے کی قیمت پر دباؤ رہا۔
رپورٹس کے مطابق اسپاٹ گولڈ 0.5 فیصد کمی کے بعد 4,326.75 ڈالر فی اونس پر ٹریڈ کر رہا ہے۔ جبکہ دسمبر کے لیے امریکی گولڈ فیوچرز تقریباً 1 فیصد گر کر 4,382.50 ڈالر فی اونس پر آ گئے۔
سونا جمعرات کو 5 جون کے بعد اپنی بلند ترین سطح پر پہنچ گیا تھا، لیکن اس کے بعد قیمت میں 1.3 فیصد کی کمی ریکارڈ کی گئی۔
دیگر دھاتوں میں بھی کمی دیکھی گئی۔ چاندی کی اسپاٹ قیمت 0.4 فیصد گر کر 64.17 ڈالر فی اونس رہی۔ پلاٹینم 0.3 فیصد کمی کے ساتھ 1,711.84 ڈالر فی اونس پر آ گیا۔ پیلیڈیم 1,306.98 ڈالر فی اونس پر مستحکم رہا۔
مارکیٹ ماہرین کا کہنا ہے کہ حالیہ تیزی کے بعد کچھ سرمایہ کار منافع حاصل کر رہے ہیں، اور فوری طور پر سونے کی قیمت میں مزید اضافے کے لیے کوئی بڑا محرک موجود نہیں ہے۔
اس کے ساتھ ہی امریکی مہنگائی کے نسبتاً نرم اعداد و شمار نے بھی مارکیٹ کو متاثر کیا۔ جولائی میں امریکی پروڈیوسر قیمتوں میں کوئی اضافہ نہیں ہوا، جبکہ صارفین کی قیمتوں میں معمولی اضافہ ریکارڈ کیا گیا۔
