یوٹیوب نے شارٹس میں نئے فیچر متعارف کرا دیے

نیویارک: یوٹیوب نے شارٹس کو مزید دلچسپ اور مؤثر بنانے کے لیے تصاویر پر مبنی پوسٹس کے نئے فیچرز متعارف کرا دیے ہیں، جن کے ذریعے کریئیٹرز ویڈیو کے بجائے تصاویر کی مدد سے بھی اپنے ناظرین تک بہتر انداز میں رسائی حاصل کر سکیں گے۔

کمپنی کے مطابق صارفین اب یوٹیوب شارٹس میں زیادہ سے زیادہ 10 تصاویر پر مشتمل کیروسل پوسٹس اپ لوڈ کر سکیں گے، جنہیں ناظرین سوائپ کرکے دیکھ سکیں گے۔ اس کے علاوہ ہر تصویر پر اپنی مرضی کا متن شامل کرنے اور 15 سیکنڈ تک کا بیک گراؤنڈ میوزک لگانے کی سہولت بھی فراہم کی گئی ہے۔

میوزک کے لیے صارفین یوٹیوب کے لائسنس یافتہ میوزک کیٹلاگ، یوٹیوب آڈیو لائبریری اور جہاں دستیاب ہو وہاں ڈریم ٹریک سے بھی فائدہ اٹھا سکیں گے۔

یوٹیوب کا کہنا ہے کہ ان فیچرز کا مقصد کریئیٹرز کو شارٹس فیڈ میں بصری انداز میں کہانیاں اور تخلیقی مواد پیش کرنے کے مزید مواقع فراہم کرنا ہے، جبکہ موسیقاروں کے لیے بھی اپنی موسیقی زیادہ وسیع سامعین تک پہنچانے اور اسے دریافت کیے جانے کے امکانات بڑھیں گے۔

یہ اپ ڈیٹ یوٹیوب شارٹس کو انسٹاگرام اور ٹک ٹاک کے مزید قریب لے آتی ہے، جہاں تصاویر پر مبنی کیروسل اور فوٹو پوسٹس پہلے ہی مقبول فارمیٹس بن چکے ہیں۔ انسٹاگرام کافی عرصے سے میوزک کے ساتھ کیروسل پوسٹس کی سہولت فراہم کر رہا ہے، جبکہ ٹک ٹاک بھی فوٹو پوسٹس کو مختصر ویڈیوز کے متبادل فارمیٹ کے طور پر پیش کر چکا ہے۔

کمپنی کے مطابق یہ نیا فیچر بالخصوص ان کریئیٹرز اور آرٹسٹس کے لیے فائدہ مند ثابت ہوگا جو مختلف سوشل میڈیا پلیٹ فارمز پر بیک وقت مواد شیئر کرتے ہیں، کیونکہ اب انہیں اپنے پروموشنل اور تخلیقی مواد کے لیے ایک اور مانوس اور مؤثر فارمیٹ میسر ہوگا۔