پاکستان نے بھارتی وزیر دفاع کے حالیہ بیانات کی شدید مذمت کرتے ہوئے انہیں اشتعال انگیز اور حقائق کے منافی قرار دیا ہے۔
ترجمان دفتر خارجہ نے کہا کہ جموں و کشمیر کا تنازع اقوام متحدہ کے ایجنڈے پر موجود ہے، جبکہ بھارتی وزیر دفاع کا بیان اس تنازع کی حقیقت کو مسخ کرنے کے مترادف ہے۔
ترجمان کے مطابق بھارتی بیانات علاقائی اور عالمی امن کو خطرے میں ڈالنے والی پالیسی کا عکاس ہیں۔ انہوں نے کہا کہ بھارت کی جانب سے لگائے جانے والے الزامات کا مقصد جموں و کشمیر میں مبینہ غیر قانونی اقدامات اور دیگر معاملات سے عالمی توجہ ہٹانا ہے۔
دفتر خارجہ کے ترجمان نے مزید کہا کہ بھارت خطے میں دہشت گردی کی مبینہ سرپرستی اور داخلی مسائل سے توجہ ہٹانے کی کوشش کر رہا ہے۔ انہوں نے گزشتہ سال کے آپریشن “بنیان المرصوص” کا حوالہ دیتے ہوئے کہا کہ پاکستان نے بھارتی جارحیت کا مؤثر جواب دیا۔
ترجمان نے کہا کہ پاکستانی قوم اور مسلح افواج کسی بھی بھارتی مہم جوئی کا جواب دینے کی مکمل صلاحیت اور عزم رکھتی ہیں۔
پاکستان نے اقوام متحدہ اور عالمی برادری سے مطالبہ کیا کہ وہ بھارت کے غیر ذمہ دارانہ طرزِ عمل کا نوٹس لے اور خطے کے امن و استحکام کے لیے اپنا کردار ادا کرے۔
تازہ ترین خبروں کے لیے پی این آئی کا فیس بک پیج فالو کریں
