آزاد جموں و کشمیر میں گرمائی زون کے تعلیمی اداروں کی تعطیلات میں مزید چار روز کی توسیع کردی گئی ہے۔
سیکرٹری ایلیمنٹری اینڈ سیکنڈری ایجوکیشن کی جانب سے جاری نوٹیفکیشن کے مطابق گرمائی زون کے تحت آنے والے سرکاری اور نجی تعلیمی ادارے 10 اگست سے 13 اگست 2026 تک بند رہیں گے۔
محکمہ تعلیم کے فیصلے کے بعد طلبہ، والدین اور اساتذہ میں تعطیلات کے حوالے سے پائی جانے والی غیر یقینی صورتحال ختم ہوگئی ہے۔ حکام نے واضح کیا ہے کہ توسیع کا اطلاق آزاد کشمیر کے تمام متعلقہ گرمائی تعلیمی اداروں پر یکساں طور پر ہوگا اور نجی ادارے بھی اس سے مستثنیٰ نہیں ہوں گے۔
نئے شیڈول کے تحت تعلیمی ادارے 13 اگست تک بند رہیں گے۔ تدریسی سرگرمیوں کے دوبارہ آغاز سے متعلق مزید ہدایات محکمہ تعلیم کی جانب سے جاری کی جائیں گی۔
دوسری جانب 14 اگست بروز جمعہ یومِ آزادی کے موقع پر سرکاری تعطیل ہوگی، جبکہ اس کے بعد ہفتہ اور اتوار کی ہفتہ وار تعطیلات ہوں گی۔ اس طرح موجودہ شیڈول کے تحت تعلیمی اداروں میں تعطیلات کا سلسلہ 17 اگست تک جاری رہنے کا امکان ہے، تاہم 13 اگست کے بعد تعلیمی سرگرمیوں کے آغاز سے متعلق محکمہ تعلیم کی حتمی ہدایات کا انتظار رہے گا۔
واضح رہے کہ 10 اگست کو پونچھ ڈویژن کے اضلاع باغ اور حویلی میں انتخابات ہو رہے ہیں، جبکہ راولاکوٹ میں جاری دھرنے کے باعث بھی صورتحال حساس بتائی جا رہی ہے۔ ان حالات کے پیش نظر تعلیمی اداروں کی معمول کی سرگرمیوں کے حوالے سے خدشات موجود تھے۔
حکومت کی جانب سے فی الحال 13 اگست تک تعطیلات میں توسیع کا باضابطہ اعلان کیا گیا ہے۔ اس کے بعد تعلیمی ادارے معمول کے مطابق کھلیں گے یا تعطیلات میں مزید توسیع ہوگی، اس کا فیصلہ محکمہ تعلیم کی آئندہ ہدایات کی روشنی میں کیا جائے گا۔
والدین اور طلبہ کو ہدایت کی گئی ہے کہ وہ غیر مصدقہ اطلاعات کے بجائے محکمہ تعلیم آزاد کشمیر کی جانب سے جاری سرکاری نوٹیفکیشن اور ہدایات کو ہی حتمی سمجھیں۔
