گرمی کا موسم جہاں انسانوں کے لیے مشکلات پیدا کرتا ہے، وہیں آپ کے اسمارٹ فون پر بھی اس کے منفی اثرات مرتب ہوتے ہیں جس کے نتیجے میں مختلف خرابیاں پیدا ہوجاتی ہیں۔
آج کل اسمارٹ فون ہماری روزمرہ زندگی کا اہم حصہ بن چکا ہے، رابطے سے لے کر بینکنگ، دفتری کام، فٹنس ٹریکنگ اور تفریح تک کئی ضروری کام اسی ایک ڈیوائس کے ذریعے انجام دیے جاتے ہیں۔
ماہرین کے مطابق زیادہ تر اسمارٹ فونز 0 سے 35 ڈگری سینٹی گریڈ کے درمیان بہتر کارکردگی دکھاتے ہیں۔ جب درجہ حرارت اس حد سے بڑھ جاتا ہے، خاص طور پر براہِ راست دھوپ میں، تو فون تیزی سے گرم ہونے لگتا ہے۔
اس کا نتیجہ بیٹری جلد ختم ہونے، فون کی رفتار کم ہونے، اسکرین کے سست ردعمل اور بعض اوقات فون کے اچانک بند ہونے کی صورت میں نکلتا ہے۔
ضرورت سے زیادہ گرمی صرف وقتی مسئلہ نہیں بلکہ یہ بیٹری کی عمر کم کر سکتی ہے اور فون کے اندرونی پرزوں کو مستقل نقصان بھی پہنچا سکتی ہے۔
فون کو گرمی کے نقصانات سے بچانے کے لیے چند آسان احتیاطی تدابیر اختیار کی جا سکتی ہیں۔ سب سے اہم بات یہ ہے کہ فون کو کبھی بھی بند گاڑی میں نہ چھوڑیں کیونکہ گاڑی کے اندر درجہ حرارت بہت تیزی سے خطرناک حد تک بڑھ سکتا ہے۔
کمزور سگنل والے علاقوں میں اگر نیٹ ورک کی ضرورت نہ ہو تو فون کو ایئرپلین موڈ پر رکھنا بہتر ہے، کیونکہ مسلسل سگنل تلاش کرنے سے فون زیادہ گرم ہوتا ہے۔
اسی طرح اگر فون پہلے سے گرم ہو تو اسے فوراً چارج نہ کریں۔ پہلے اسے ٹھنڈا ہونے دیں اور پھر چارج کریں۔ گرمی کے موسم میں وائرلیس چارجنگ سے بھی حتی الامکان گریز کرنا چاہیے کیونکہ اس سے اضافی حرارت پیدا ہوتی ہے۔
گاڑی چلاتے وقت فون کو ڈیش بورڈ پر لگا کر نیویگیشن استعمال کرنا بھی فون کے درجہ حرارت میں اضافہ کر سکتا ہے۔ ایسی صورت میں اسکرین کی روشنی کم رکھیں اور اگر ممکن ہو تو فون کو ایئرکنڈیشنر کے قریب رکھیں۔
بیٹری سیونگ موڈ استعمال کرنا بھی مفید ثابت ہوتا ہے کیونکہ یہ غیر ضروری پراسیسنگ اور بیک گراؤنڈ سرگرمیوں کو محدود کر کے فون کو ٹھنڈا رکھنے میں مدد دیتا ہے۔
ماہرین مشورہ دیتے ہیں کہ فون کو ہمیشہ براہِ راست دھوپ سے بچایا جائے۔ اسے سایہ دار جگہ، بیگ یا کسی نسبتاً ٹھنڈی جگہ پر رکھنا بہتر ہے۔ اس کے علاوہ گھر سے باہر نکلنے سے پہلے غیر ضروری بیک گراؤنڈ ایپس بند کر دینا بھی فون کی کارکردگی بہتر رکھنے اور اضافی حرارت سے بچانے میں مددگار ثابت ہوتا ہے۔
مختصراً یہ کہ گرمی کے موسم میں چند سادہ احتیاطی تدابیر اپنا کر اسمارٹ فون کی کارکردگی بہتر رکھی جا سکتی ہے اور اس کی عمر میں بھی اضافہ کیا جا سکتا ہے۔
تازہ ترین خبروں کے لیے پی این آئی کا فیس بک پیج فالو کریں
