امریکابمقابلہ آئرلینڈ میچ شروع نہ ہوسکا، پاکستان کا ٹی ٹونٹی ورلڈکپ میں سفر تمام ہونے کا امکان

فلوریڈا (پی این آئی) آئی سی سی مینز ٹی ٹوئنٹی ورلڈکپ میں آج آئرلینڈ اور امریکا کے درمیان گروپ اے کا اہم میچ کھیلا جائےگا جو کہ گرین شرٹس کے ایونٹ میں مستقبل کا فیصلہ کرے گا۔

تاہم لاڈرہل فلوریڈا میں ہونے والا یہ اہم میچ بارش کی وجہ سے گیلی آؤٹ فیلڈ کے باعث تاخیر کا شکار ہے اور اب تک ٹاس بھی نہیں ہوسکا۔ امپائرز پاکستانی وقت کے مطابق 7:30 بجے گراؤنڈ کا معائنہ کریں گے۔ واضح رہے کہ لاڈرہل فلوریڈا میں آئرلینڈ اور امریکا کے درمیان میچ میں موسم اثر انداز ہوسکتا ہے۔ میچ کے دوران طوفانی ہوائیں چلنے اور بارش کا کافی امکان ہے جو کہ پاکستان کی امیدوں پر پانی پھیر سکتی ہے۔ امریکا اور پاکستان کے درمیان میچ مقامی وقت کے مطابق ساڑھے 10 بجے ( پاکستانی وقت کے مطابق ساڑھے 7 بجے) شروع ہونا تھا۔ لاڈرہل فلوریڈا میں مقامی وقت کے مطابق صبح 10 بجے سے دوپہر 12 بجے کے درمیان بارش کے 20 سے 34 فیصد امکانات ہیں جو کے بعد میں 70 سے 80 فیصد تک بڑھ جائیں گے۔

امید کی جارہی ہے کہ میچ تاخیر کے بغیر شروع ہو البتہ بارش کی وجہ سے کھیل نہ ہوا تو امریکا 5 پوائنٹس لے کر اگلے مرحلے میں پہنچ جائےگا۔ امریکا کی فتح بھی آئرلینڈ اور پاکستان کو سپر 8 کی دوڑ سے باہر کردے گی لیکن اگر آئرلینڈ نے امریکا کو شکست دی تو پاکستان اور آئرلینڈ کے اگلے مرحلے میں پہنچنے کے امکانات بڑھ جائیں گے۔