ڈیلرز کا ایل پی جی سستی کرنے سے صاف انکار، اوگرا کی منظوری کے باوجود عوام کو ریلیف نہ مل سکا

لاہور (پی این آئی) عوام ریلیف سے محروم رہ گئی، ایل پی جی ڈیلرز کا اوگرا کی اعلان کردہ قیمت پر گیس فروخت کرنے سے صاف انکار، اوگرا کی جانب سے اپریل کے ماہ کیلئے ایل پی جی کی نئی قیمت 227 روپے مقرر کیے جانے کے باوجود مارکیٹ میں فی کلو گیس تاحال 270 روپے تک کی قیمت میں فروخت جاری۔

تفصیلات کے مطابق آئل اینڈ گیس ریگولیٹری اتھارٹی اوگرا کی طرف سے ایل پی جی کی قیمت میں 49 روپے فی کلو گرام کمی کے باوجود صارفین کو سستی گیس فراہم نہیں کی جارہی، نئی قیمت 229 روپے فی کلو گرام مقرر ہے مگر ایل پی جی مافیا 260 روپے فی کلو گرام سے لے کر 270 روپے کلو گرام میں فروخت کر رہا ہے۔لاہور کے مختلف علاقوں میں ایل پی جی ڈسٹری بیوٹرز من پسند نرخوں پر ہی ایل پی جی فروخت کررہے ہیں۔ایل پی جی ڈسٹری بیوٹرز کا کہنا ہے کہ اوگرا نے قیمت میں کمی تو کردی مگر ایل پی جی مارکیٹنگ کمپنیوں کی طرف سے اوگرا کی مقرر کردہ قیمت پر ایل پی جی نہیں مل رہی جب تک سرکاری قیمت پر سپلائی نہیں ملے گی عوام کو سستی اور سرکاری قیمت پر گیس نہیں دے سکتے۔ایل پی جی ڈسٹری بیوٹر ایسوسی ایشن کے چیئرمین عرفان کھوکھر کے مطابق حکومت سے درخواست ہے کہ سپلائی چین کو سرکاری قیمت کے مطابق کیا جائے کیوں کہ مافیا ایل پی جی صارفین کو دونوں ہاتھوں سے لوٹ رہا ہے۔

لاہور میں 50 روپے فی کلو کی بلیک مارکیٹنگ ہورہی ہے، اوگرا نے سرکاری قیمت 229 روپے جاری کی ہے تو اس قیمت پر صارفین کو فراہم بھی کرے۔ انہوں نے کہا کہ اوگرا سمیت ضلعی انتظامیہ کو اس سلسلے میں تحریری طور پر آگاہ کردیا ہے کہ لوٹ مار روکی جائے مگر نہ تو اوگرا اور نہ ہی صوبائی و ضلعی انتظامیہ اس لوٹ مار کو روک رہی ہے۔