اگر آپ آئندہ دنوں میں بین الاقوامی سفر کا ارادہ رکھتے ہیں تو یہ جاننا ضروری ہے کہ مشرقِ وسطیٰ میں جاری کشیدہ صورتحال کے باعث متعدد بین الاقوامی ایئرلائنز نے اپنی پروازیں عارضی طور پر معطل یا محدود کر دی ہیں۔ اگست، ستمبر اور اکتوبر کے دوران کئی ایئرلائنز نے اپنی روٹ معطلی میں توسیع کی ہے، جس کے باعث دبئی اور مشرقِ وسطیٰ کے دیگر شہروں کے لیے سفر کرنے والے مسافروں کو تاخیر، دوبارہ بکنگ اور سفری منصوبوں میں تبدیلی جیسے مسائل کا سامنا کرنا پڑ رہا ہے۔
کئی ایئرلائنز نے پروازوں کی تعداد بھی کم کر دی ہے یا اپنے شیڈول میں تبدیلیاں کی ہیں، اس لیے مسافروں کو مشورہ دیا جاتا ہے کہ روانگی سے قبل اپنی متعلقہ ایئرلائن سے پرواز کی تازہ ترین صورتحال ضرور معلوم کر لیں، کیونکہ پروازوں کی بحالی کی تاریخیں تبدیل ہو سکتی ہیں۔
جن ایئرلائنز نے مختلف روٹس پر اپنی پروازیں معطل یا محدود کی ہیں ان میں ایجین ایئر لائنز، ایئر آستانہ، ایئر کینیڈا، ایئر فرانس، ایئر بالٹک، برٹش ایئرویز، کیتھے پیسیفک، فن ایئر، آئی ٹی اے ایئرویز، کے ایل ایم، لفتھانسا گروپ، فلپائن ایئر لائنز، سکوٹ، سنگاپور ایئر لائنز، ترکش ایئر لائنز اور ویز ایئر شامل ہیں۔
ترکش ایئر لائنز نے دبئی، ابوظہبی، دمشق، بیروت اور عمان کے لیے اپنی پروازیں دوبارہ بحال کر دی ہیں، تاہم ایران کے لیے اس کی فضائی خدمات تاحال معطل ہیں۔ دوسری جانب ویز ایئر نے دبئی، ابوظہبی اور عمان کے لیے اپنی پروازیں فی الحال معطل رکھی ہیں، جبکہ توقع ہے کہ ستمبر کے دوران ان روٹس پر آپریشن دوبارہ شروع کر دیا جائے گا۔
