*پنجاب کے اسکول 24 اگست سے کھلیں گے، صفائی اور سیکیورٹی کی خصوصی ہدایات جاری*
پنجاب بھر کے سرکاری و نجی اسکول موسم گرما کی تعطیلات کے بعد *24 اگست* سے دوبارہ کھل جائیں گے۔ وزیر تعلیم پنجاب رانا سکندر حیات نے متعلقہ حکام کو اسکول کھولنے سے قبل تمام انتظامات مکمل کرنے کی ہدایت کر دی ہے۔
وزیر تعلیم نے کہا کہ تمام اسکولوں میں کلاس رومز، واش رومز، کھیل کے میدان اور دیگر مقامات کی صفائی یقینی بنائی جائے۔ اس کے ساتھ اسکولوں میں طلبہ کے لیے صاف اور محفوظ پینے کے پانی کی فراہمی بھی لازم ہے۔
انہوں نے مزید ہدایت کی کہ پانی کی ٹینکیوں اور چھتوں کی صفائی اور جراثیم کشی کی جائے۔ مون سون کے پیش نظر اسکولوں میں نکاسی آب کے نظام کو چیک کیا جائے اور ڈینگی سے بچاؤ کے ایس او پیز پر سختی سے عملدرآمد کرایا جائے۔ اسکولوں میں مچھروں کی افزائش کے ممکنہ مقامات کو ختم کیا جائے۔
وزیر تعلیم نے یہ بھی کہا کہ زیر تعمیر یا مرمتی کام والے علاقوں کو طلبہ سے محفوظ رکھنے کے لیے رکاوٹیں لگائی جائیں۔ اس کے علاوہ پنکھے، لائٹس، سوئچز، ساکٹس اور بجلی کی وائرنگ کی مکمل جانچ کی جائے۔
سیکیورٹی کے حوالے سے ہدایت کی گئی کہ تمام اسکولوں میں سیکیورٹی ایس او پیز پر عمل کیا جائے اور اسکول کھلنے سے قبل سی سی ٹی وی کیمروں سمیت دیگر سیکیورٹی آلات کو فعال کیا جائے۔
رانا سکندر حیات نے کہا کہ اسکول دوبارہ کھولنے سے قبل سربراہان خود حتمی معائنہ کریں۔ غفلت، تاخیر یا ہدایات پر عمل نہ کرنے کی صورت میں کارروائی ہوگی۔
#پنجاب_تعلیم #اسکول_کھل_گئے #موسم_گرما_تعطیلات #ڈینگی #سیکیورٹی #پنجاب
