شدید مون سون بارشوں کا نیا سلسلہ شروع، پی ڈی ایم اے کا الرٹ جاری

لاہور: صوبہ پنجاب کے بیشتر اضلاع میں آج سے مون سون کی مزید بارشوں کا آغاز ہونے جا رہا ہے۔ ترجمان پی ڈی ایم اے کے مطابق مون سون بارشوں کا چوتھا اور نسبتاً طاقتور سلسلہ 25 جولائی تک جاری رہے گا۔

محکمے کے مطابق راولپنڈی، مری، گلیات، اٹک، چکوال، منڈی بہاؤالدین، حافظ آباد، گجرات، جہلم اور گوجرانوالہ میں بارشیں متوقع ہیں۔ اس کے علاوہ لاہور، فیصل آباد، سیالکوٹ، نارووال، ٹوبہ ٹیک سنگھ، جھنگ، سرگودھا، میانوالی، ڈیرہ غازی خان، بہاولپور، بہاولنگر اور ملتان بھی بارش کی لپیٹ میں آئیں گے۔ ڈی جی پی ڈی ایم اے عرفان علی نے خبردار کیا ہے کہ بالائی علاقوں میں شدید بارشوں کے باعث دریاؤں میں پانی کے بہاؤ میں اضافے کا خدشہ ہے۔ ندی نالوں اور دریاؤں میں طغیانی کا الرٹ جاری کر دیا گیا ہے، جبکہ دریائے راوی، جہلم، ستلج اور چناب میں بھی پانی کی سطح بلند ہونے کا امکان ظاہر کیا گیا ہے۔

ترجمان کے مطابق دریائے سندھ میں تونسہ کے مقام پر درمیانے درجے کا سیلاب ہے، جبکہ تربیلا، کالا باغ اور چشمہ کے مقامات پر نچلے درجے کا سیلاب ریکارڈ کیا گیا ہے۔ عوام کو ہدایت کی گئی ہے کہ احتیاطی تدابیر اختیار کریں اور متعلقہ حکام سے رابطے میں رہیں۔