برطانیہ میں بھنگ کے خلاف بڑا آپریشن

ہرٹ فورڈ شائر میں منظم جرائم کے سنڈیکیٹس کے خلاف پولیس نے بھرپور کارروائی کرتے ہوئے بھنگ کی کاشت کے خاتمے کے لیے فروری بھر میں متعدد آپریشن کیے۔

اس دوران 12 سے زائد سرچ وارنٹس پر عمل درآمد ہوا جن میں بشپس اسٹارٹ فورڈ، چیشنٹ، کروکسلے گرین، اسٹیونیج، رائسٹن اور واٹ فورڈ جیسے علاقوں میں چھاپے مارے گئے۔ ان کارروائیوں میں 2,000 سے زائد بھنگ کے پودے اور 3.5 کلو گرام بھنگ ضبط کی گئی جس کی مالیت تقریباً 1.7 ملین پاؤنڈز بتائی جا رہی ہے۔یہ آپریشن مقامی پولیسنگ کمانڈ، آپریشنل انٹیلی جنس، آپریشنل سپورٹ گروپ، کیس انویسٹی گیشن ٹیم اور محفوظ پڑوس یونٹس کے باہمی تعاون سے عمل میں آیا۔

جاسوس انسپکٹر پال اسٹین برج کا کہنا ہے کہ بھنگ کی کاشت منظم جرائم پیشہ گروہوں کی بڑی آمدنی کا ذریعہ ہے جو دیگر غیر قانونی سرگرمیوں کی مالی معاونت کے لیے استعمال ہوتی ہے۔پال اسٹین برج نے کہا کہ ان آپریشنز نے ناصرف ان مجرمانہ نیٹ ورکس کو نقصان پہنچایا بلکہ ممکنہ طور پر گلیوں تک پہنچنے والی منشیات کو بھی روکا ہے۔انہوں نے مزید کہا کہ پولیس دیگر قانون نافذ کرنے والے اداروں اور قومی تنظیموں کے ساتھ مل کر منظم جرائم پیشہ گروہوں کے خلاف کارروائیوں کو مزید مؤثر بنا رہی ہے۔

پال اسٹین برج کا یہ بھی کہنا ہے کہ بھنگ کے فارمز کے ممکنہ خطرات آگ، بجلی کے حادثات، سماج دشمن سرگرمیاں اور تشدد سے عوام کو آگاہ کرنے کے لیے بھی اقدامات کیے جا رہے ہیں۔پولیس کی جانب سے رہائشیوں کو تاکید کی گئی ہے کہ وہ چوکس رہیں اور بھنگ کی کاشت سے متعلق کسی بھی مشتبہ سرگرمی کی اطلاع پولیس کو دیں۔