سعودی فوجی اتحاد نے حوثیوں کا ریاض پر بیلسٹک میزائل حملہ ناکام بنا دیا۔
رائٹرز کے مطابق سعودی قیادت میں قائم اتحاد نے دعویٰ کیا ہے کہ یمن کے حوثی گروپ کی جانب سے دارالحکومت ریاض کی طرف داغا گیا بیلسٹک میزائل تباہ کر دیا گیا ہے۔
سعودی عرب نے پیر 12 اکتوبر کو ریاض میں ممکنہ خطرے سے متعلق انتباہ جاری کیا تھا۔ رائٹرز کے عینی شاہد کے مطابق پیر کو ریاض میں تین زور دار آوازیں بھی سنی گئیں، تاہم ان آوازوں کا میزائل تباہ کرنے کی کارروائی سے تعلق واضح نہیں۔
حوثی گزشتہ ہفتے سے سعودی ایئرپورٹس اور تیل تنصیبات پر حملے کر رہے ہیں۔ کنگ خالد انٹرنیشنل ایئرپورٹ پر حالیہ حملوں میں ہفتے کو 13 افراد جاں بحق اور 300 سے زائد زخمی ہوئے، جبکہ اتوار کے حملے میں ایک شخص جاں بحق اور متعدد زخمی ہوئے، جس سے فضائی آپریشن بھی متاثر ہے۔
دوسری جانب ایران نے حوثیوں اور سعودی عرب کے درمیان مذاکرات میں سہولت فراہم کرنے کی پیشکش کی ہے، جبکہ متحدہ عرب امارات نے خلیجی ممالک کے مشترکہ دفاعی تعاون کو فعال کرنے پر زور دیا ہے۔
