اسلام آباد (پی این آئی) وزیراعظم نے تحریک عدم اعتماد کے پیش نظر اپنے حامی ارکان سے رابطے بڑھانے کا فیصلہ کیا ہے جب کہ اپوزیشن بھی اس حوالے سے متحرک ہوگئی، جہانگیر ترین ایک بار پھر منظر عام پر آگئے اور ان کی خفیہ ملاقاتوں کی بازگشت شروع ہوگئی ہے، ذرائع نے بتایا کہ حکومتی اتحادی جماعت مسلم لیگ ق نے تمام فیصلوں کا اختیار چوہدری پرویز الٰہی کو اور تحریک انصاف کے ناراض گروپ نے جہانگیر ترین کو اختیار دے دیا ہے۔
اپوزیشن کی جانب سے وزیراعظم کے خلاف تحریک عدم اعتماد لانے کے اعلان کے بعد حزب اختلاف و اقتدار اپنے اپنے طور پر متحرک نظر آرہے ہیں، اور فروری کا آخری اور مارچ کا پہلا ہفتہ سیاسی طور اہم ہے۔ اس حوالے سے ذرائع کا کہنا ہے کہ وزیراعظم عمران خان نے تمام ارکان صوبائی و قومی اسمبلی سے رابطے بڑھانے کا فیصلہ کرلیا ہے اور وزیر اعلی پنجاب عثمان بزدار کو بھی تمام ارکان سے براہ راست رابطوں کا ٹاسک دے دیا گیا ہے۔ذرائع کے مطابق وزیراعظم عمران خان نے اپوزیشن کے لئے جوابی حکمتِ عملی وضع کرلی ہے، اور وزیراعظم کے عوامی جلسوں سے خطابات بھی اسی سلسلے کی کڑی ہیں۔دوسری طرف ذرائع نے بتایا کہ تحریک انصاف کے ناراض رہنما جہانگیر ترین بھی ایک مرتبہ پھر سیاسی منظر نامے پر نمودار ہوگئے ہیں، اور ان کی خفیہ ملاقاتوں کی بازگشت بھی سنائی دے رہی ہے۔
