بورڈ آف انٹرمیڈیٹ اینڈ سیکنڈری ایجوکیشن لاہور نے نویں جماعت (SSC پارٹ اول) کے پہلے سالانہ امتحان 2026 کا سرکاری نتیجہ اور رزلٹ گزٹ جاری کر دیا۔
سرکاری گزٹ کے مطابق امتحان میں 2 لاکھ 80 ہزار 676 امیدواروں نے شرکت کی، جن میں سے 1 لاکھ 30 ہزار 543 امیدوار کامیاب ہوئے۔ مجموعی کامیابی کا تناسب 46.51 فیصد رہا۔ لاہور بورڈ کو امتحان کے لیے 2 لاکھ 87 ہزار 597 درخواستیں موصول ہوئی تھیں، جبکہ تحریری امتحانات 17 اپریل سے 8 مئی 2026 تک منعقد ہوئے۔ نتائج کا اعلان 2 ستمبر 2026 کو کیا گیا۔
نتائج میں لاہور کے علاوہ قصور، شیخوپورہ اور ننکانہ صاحب کے ریگولر اور پرائیویٹ امیدوار بھی شامل ہیں۔ سرکاری رزلٹ گزٹ 1,799 صفحات پر مشتمل ہے، جس میں امیدواروں کے انفرادی نتائج، ادارہ وار ریکارڈ، مضامین کے نتائج اور مختلف گروپس کی کارکردگی شامل ہے۔
ریگولر اور پرائیویٹ امیدواروں کی کارکردگی
ریگولر امیدواروں میں 1 لاکھ 80 ہزار 264 نے امتحان دیا، جن میں سے 96 ہزار 566 کامیاب ہوئے اور کامیابی کا تناسب 53.57 فیصد رہا۔
پرائیویٹ امیدواروں میں 1 لاکھ 412 نے امتحان میں شرکت کی، جن میں سے 33 ہزار 977 کامیاب ہوئے۔ ان کی کامیابی کا تناسب 33.84 فیصد رہا۔
طالبات کی کارکردگی بہتر
طالبات نے نویں جماعت کے امتحانات میں طلبہ کے مقابلے میں بہتر کارکردگی کا مظاہرہ کیا۔ 1 لاکھ 50 ہزار 882 طالبات میں سے 82 ہزار 410 کامیاب ہوئیں اور کامیابی کا تناسب 54.62 فیصد رہا۔
طلبہ میں 1 لاکھ 29 ہزار 794 امیدوار شریک ہوئے، جن میں سے 48 ہزار 133 کامیاب ہوئے۔ طلبہ کی کامیابی کی شرح 37.08 فیصد رہی۔
سائنس گروپ سب سے آگے
سائنس گروپ کے 2 لاکھ 3 ہزار 844 امیدواروں میں سے 1 لاکھ 11 ہزار 802 کامیاب ہوئے، جس کے باعث کامیابی کا تناسب 54.85 فیصد رہا۔
ہیومینیٹیز یا آرٹس گروپ میں کامیابی کی شرح 22.93 فیصد جبکہ ٹیکنیکل گروپ میں 41.39 فیصد رہی۔
اہم مضامین میں ترجمۃ القرآن میں کامیابی کا تناسب 94.03 فیصد، اردو میں 93.93 فیصد اور اسلامیات میں 91.35 فیصد رہا۔ انگریزی میں 80.52 فیصد، فزکس میں 78.94 فیصد، بائیولوجی میں 73.84 فیصد اور کیمسٹری میں 70.89 فیصد امیدوار کامیاب ہوئے۔
ریاضی میں کامیابی کی شرح 62.34 فیصد جبکہ کمپیوٹر سائنس و انٹرپرینیورشپ میں 69.23 فیصد رہی۔
سرکاری اور نجی اسکولوں کی کارکردگی میں نمایاں فرق
نتائج میں سرکاری اور نجی تعلیمی اداروں کے طلبہ کی کامیابی کی شرح میں واضح فرق سامنے آیا۔ سرکاری اداروں کے 1 لاکھ ایک ہزار 79 طلبہ نے امتحان دیا، جن میں سے 40 ہزار 409 کامیاب ہوئے۔ سرکاری اسکولوں کی مجموعی کامیابی کی شرح 39.98 فیصد رہی۔
اس کے مقابلے میں نجی تعلیمی اداروں کے 79 ہزار 185 طلبہ میں سے 56 ہزار 157 کامیاب ہوئے اور کامیابی کی شرح 70.92 فیصد رہی۔
سائنس گروپ میں سرکاری اسکولوں کے طلبہ کی کامیابی کی شرح 47.79 فیصد جبکہ نجی اداروں میں 73.16 فیصد رہی۔
آرٹس گروپ میں سرکاری اسکولوں کے 25 فیصد طلبہ کامیاب ہوئے، جبکہ نجی اداروں میں کامیابی کی شرح 38.29 فیصد رہی۔
ٹیکنالوجی گروپ میں بھی نجی ادارے نمایاں رہے۔ سرکاری اسکولوں کے 40 فیصد طلبہ کامیاب ہوئے جبکہ نجی تعلیمی اداروں کے طلبہ کی کامیابی کی شرح 71.96 فیصد ریکارڈ کی گئی۔
