سونے کی قیمتیں :عالمی منڈی سے بڑی خبر آ گئی

عالمی مارکیٹ میں سونے کی قیمتوں پر دباؤ برقرار

عالمی منڈی میں سونے کی قیمتیں گزشتہ سیشن میں ہونے والی نمایاں کمی کے بعد بھی دباؤ کا شکار رہیں، جبکہ مشرقِ وسطیٰ میں بڑھتی ہوئی کشیدگی، توانائی کی قیمتوں میں اضافے اور امریکا میں شرحِ سود میں اضافے کے خدشات نے سرمایہ کاروں کو محتاط کر دیا ہے۔

بلوم برگ کے مطابق اسپاٹ گولڈ تقریباً 4,010 ڈالر فی اونس کی سطح پر ٹریڈ کرتا رہا، جبکہ گزشتہ کاروباری روز سونے کی قیمت میں 2.9 فیصد کمی ریکارڈ کی گئی تھی۔

رپورٹ کے مطابق امریکی صدر ڈونلڈ ٹرمپ کی جانب سے ایران کے خلاف بحری ناکہ بندی دوبارہ نافذ کرنے کے اعلان اور آبنائے ہرمز سے گزرنے والے تجارتی کارگو پر 20 فیصد ادائیگی کے مطالبے کے بعد امریکا اور ایران کے درمیان کشیدگی میں اضافہ ہوا۔ اس صورتحال کے باعث خام تیل اور یورپی قدرتی گیس کی قیمتوں میں بھی نمایاں اضافہ دیکھا گیا۔

تجزیہ کاروں کا کہنا ہے کہ توانائی کی قیمتوں میں اضافہ افراطِ زر کو بڑھا سکتا ہے، جس کے نتیجے میں امریکی فیڈرل ریزرو کی جانب سے شرحِ سود میں مزید اضافے کے امکانات پیدا ہو سکتے ہیں۔ چونکہ سونا کوئی منافع یا سود فراہم نہیں کرتا، اس لیے بلند شرحِ سود کے ماحول میں اس کی طلب متاثر ہوتی ہے۔

سرمایہ کار اب امریکی معاشی اعداد و شمار اور فیڈرل ریزرو کے آئندہ پالیسی فیصلوں پر نظریں جمائے ہوئے ہیں، کیونکہ یہی عوامل عالمی مارکیٹ میں سونے کی قیمتوں کے مستقبل کے رجحان کا تعین کریں گے۔