معروف امریکی اداکار نے اسلام قبول کر لیا ہے

سعودی میڈیا میں گردش کرنے والی رپورٹس کے مطابق مشہور ٹی وی سیریز بریکنگ بیڈ میں گس فرِنگ کا کردار ادا کرنے والے معروف امریکی اداکار جیانکارلو ایسپوسیتو نے اسلام قبول کر لیا ہے۔

رپورٹس میں بتایا گیا ہے کہ ترکی آل الشیخ نے دعویٰ کیا کہ جیانکارلو ایسپوسیتو نے سعودی عرب میں قیام کے دوران اسلام قبول کرنے کا فیصلہ کیا۔ ان کے مطابق اداکار کے مثبت تجربات اور مسلمانوں سے روابط اس فیصلے کا سبب بنے۔

جیانکارلو ایسپوسیتو کا فلم اور ٹیلی ویژن کی دنیا میں کئی دہائیوں پر محیط کیریئر ہے۔ وہ بریکنگ بیڈ، بیٹر کال ساؤل اور دی مینڈالورین میں اپنی اداکاری کے باعث عالمی شہرت رکھتے ہیں۔

سوشل میڈیا پر شیئر کی گئی ایک ویڈیو میں اداکار کو ایک مسجد کے اندر پروڈکشن ٹیم کے دیگر ارکان کے ساتھ نماز ادا کرتے ہوئے بھی دیکھا گیا، جس کے بعد اس حوالے سے مزید بحث شروع ہو گئی ہے۔

تاہم تاحال جیانکارلو ایسپوسیتو کی جانب سے اسلام قبول کرنے کے حوالے سے کوئی باضابطہ عوامی بیان سامنے نہیں آیا، اس لیے اس دعوے کی آزاد ذرائع سے تصدیق ہونا باقی ہے۔