اسلام آباد(پی این آئی ) پاکستان تحریک انصاف کے سابق سیکرٹری جنرل اور گرفتاری کے بعد پی ٹی آئی سے لاتعلقی کا اعلان کرنے والے اسد عمر کا کہنا ہے کہ عمران خان نے ٹکٹ دیا تو وہ پی ٹی آئی کے ٹکٹ پر الیکشن لڑیں گے۔ نجی ٹی وی نیو نیوز کے مطابق اسلام آباد کی انسداد دہشت گردی کی عدالت میں پیشی کے موقع پر اسد عمر سے صحافی سے سوال کیا کہ کیا آپ پی ٹی آئی کے ٹکٹ پر الیکشن لڑیں گے؟ اسد عمر نے جواب دیا کہ اگر ٹکٹ ملا تو ضرور الیکشن لڑیں گے۔
قبل ازیں چیئرمین تحریک انصاف و سابق وزیراعظم عمران خان اور اسد عمر کا جیل سے رہائی کے بعد پہلی بار آمنا سامنا ہو گیا۔ ایڈیشنل سیشن جج سکندر خان کی عدالت میں اسد عمر نے عمران خان سے ہاتھ ملا کر سلام کیا۔نجی ٹی وی کے مطابق اسد عمر نے عمران خان سے مصافحہ کیا اور کرسی سے کھڑے ہو کر جگہ چھوڑی ۔ عمران خان کرسی پہ بیٹھنے کے بجائے روسٹرم پہ چلے گئے۔ عمران خان اور اسد عمر تھانہ مارگلہ کے مقدمے میں نامزد ہیں۔
کیس چار جولائی تک ملتوی ہوا تو اسد عمر روانہ ہوگئے جبکہ عمران خان کورٹ میں موجود رہے۔ صحافیوں کے سوال پر جواب دیا اس لیے جارہا ہوں کہ میرا کیس ختم ہوگیا ہے اور میں نے اہلیہ کو ایئرپورٹ چھوڑنا ہے۔معروف صحافی بشیر ثاقب کے مطابق سابق وزیر کے چہرے کے تاثرات بدلے ہوئے لگ رہے تھے ۔
تازہ ترین خبروں کے لیے پی این آئی کا فیس بک پیج فالو کریں
