میں ایک پروفیسر ہوں اورلیکچر دیتا ہوں شہباز گل کاامریکی یونیورسٹی کے پے رول پر ہونے کا اعتراف

اسلام آباد(پی این آئی)وزیر اعظم عمران خان کے معاون خصوصی شہباز گل نے امریکی یونیورسٹی میں لیکچر دینے سے متعلق سوال پر رد عمل کا اظہار کیا ہے۔تفصیلات کے مطابق شہباز گل نے نجی ٹی وی جیونیوز سے ایک گفتگو ٹوئٹر پر شیئر کرتے ہوئے سوالات کے جوابات دیے۔شہباز گل کے مطابق نجی ٹی وی جیونیوز نے ان سے سوال کیا کہ آپ نے لاہور میں ایک پلاٹ خریدا تھا اس کا پیسہ کہاں سے آیا؟ جس کے جواب میں شہباز گل نے لکھا کہ پلاٹ لاہور میں خریدا تھا،

پیسے فیصل بینک بلیو ایریا کے اپنے اکاؤنٹ سے کراس چیک میں ادا کیے اور ایف بی آر میں سب کچھ ڈکلئیر ہے۔ٹوئٹ میں دوسرا سوال تھا کہ کیا آپ لیکچر دیتے ہیں؟ جس کے جواب میں شہباز گل نے کہا کہ جی بالکل میں لیکچر دیتا ہوں میں ایک پروفیسر ہوں، کرپشن نہیں کرتا، ٹھیکے نہیں لیتا، حکومت سے کوئی تنخواہ نہیں لیتا اور اپنے شوق کے لیے بالکل لیکچر دیتا ہوں اور اس کی باقاعدہ اجازت لے رکھی ہے۔یاد رہے کہ انگریزی اخباردی نیوز کی رپورٹ میں انکشاف کیا گیا ہے کہ

وزیر اعظم کے معاون خصوصی شہباز گل یونیورسٹی آف الینوائے اربانا میں بطور کلینیکل اسسٹنٹ پروفیسر تعینات ہیں۔یونیورسٹی کی جانب سے دی نیوز کو ایک تحریری جواب میں تصدیق کی گئی تھی جس میں کہا گیا تھا کہ وہ اب بھی یونیورسٹی کے ملازم ہیں اور ان کی سالانہ تنخواہ 124770 ڈالرز ہے۔