اپوزیشن کاسپیکر پنجاب اسمبلی چوہدری پرویز الٰہی کیخلاف عدم اعتماد لانے کا فیصلہ

لاہور، اسلام آباد(پی این آئی)اپوزیشن کی جانب سے سپیکر پنجاب اسمبلی چوہدری پرویز الہٰی کے خلاف تحریکِ عدم اعتماد لانے کا فیصلہ کر لیا گیا۔میڈیا رپورٹس کے مطابق مسلم لیگ ن کے رہنما، پنجاب اسمبلی میں قائدِ حزبِ اختلاف حمزہ شہباز نے پارلیمانی پارٹی کے اہم لیڈروں کو مسودہ تیار کرنے کی ہدایت کر دی۔ذرائع نے مزید بتایا ہے کہ مسودہ تیار ہوتے ہی قائدِ حزبِ اختلاف حمزہ شہباز کو پیش کر دیا جائے گا۔ذرائع کا یہ بھی کہنا ہے کہ حتمی منظوری کے بعد

تحریکِ عدم اعتماد اسمبلی سیکریٹریٹ میں پیش ہو گی۔دوسری جانب مسلم لیگ (ق) کے رہنما اور اسپیکر پنجاب اسمبلی چوہدری پرویز الٰہی وزیراعلیٰ پنجاب نامزد ہونے کے بعد سرگرم ہو گئے ہیں۔اسلام آباد سے لاہور آتے ہی چوہدری پرویزالٰہی نے تحریک انصاف اور مسلم لیگ (ن) کے ارکان اسمبلی سے ملاقات کی، اس کے علاوہ انہوں نے خواتین ارکان پنجاب اسمبلی کے اعزاز میں عشائیہ بھی رکھا۔رپورٹس کے مطابق عشائیے میں ثانیہ کامران، مسرت جمشید چیمہ، سیمابیہ طاہرکے علاوہ

راجہ بشارت، مراد راس، سمیرا احمد اور دیگر ارکان اسمبلی بھی شریک ہوئے۔واضح رہے کہ اسپیکر پنجاب اسمبلی چوہدری پرویزالٰہی وزیراعلیٰ بننے کے لیے تمام گروپوں سے رابطے کر رہے ہیں۔گزشتہ روز مسلم لیگ ن کے 3 ارکان پنجاب نے بھی پرویز الٰہی کو اپنی بھرپور حمایت کا یقین دلایا تھا۔