پشاور: پاکستان تحریک انصاف (پی ٹی آئی) کے 27 ستمبر کو اسلام آباد لانگ مارچ کے حوالے سے تفصیلات سامنے آگئی ہیں۔
ذرائع کے مطابق تحریک انصاف نے 27 ستمبر کو اسلام آباد لانگ مارچ کے لیے منصوبہ بندی کرلی ہے، جس کے تحت خیبرپختونخوا کے 12 مقامات پر دھرنے دیے جائیں گے۔ پارٹی کی جانب سے اسلام آباد کی طرف مرحلہ وار پیش قدمی کی حکمت عملی طے کی گئی ہے۔
پارٹی ذرائع کے مطابق خیبرپختونخوا کی حدود میں موٹروے اور جی ٹی روڈ کو بند کیا جائے گا۔ پشاور، خیبر، نوشہرہ اور اکوڑہ خٹک اٹک پل کو بند کریں گے، جبکہ ملاکنڈ، صوابی، مردان اور چارسدہ میں موٹروے کو بند کیا جائے گا۔ اسی طرح جنوبی اضلاع میں خوشحال گڑھ پر دھرنا دیا جائے گا۔
اس سلسلے میں پارٹی تنظیموں کو دھرنا دینے کے مقامات کی تفصیلات جاری کردی گئی ہیں، جبکہ حتمی حکمت عملی کے حوالے سے وزیراعلیٰ نے اجلاس کل پشاور میں طلب کرلیا ہے۔
ہری پور میں حطار، خانپور، جھاری کس اور مکھنیال جبکہ ہزارہ موٹروے پر کیمپ لگائے جائیں گے۔ ایبٹ آباد میں باریان، کوہالہ اور صوابی میں ٹوپی جبکہ ایم این موٹروے پر کیمپ کا تعین کیا گیا ہے۔
نوشہرہ میں خیرآباد کنڈ اٹک پل، لکی مروت میں کنڈل اور کوہاٹ میں خوشحال گڑھ کے مقامات پر کیمپ لگانے کی نشاندہی کی گئی ہے۔ تمام ارکان قومی و صوبائی اسمبلی اور سینیٹرز کو کیمپ میں شرکت کرنے اور انتظامات کرنے کی ہدایت کی گئی ہے۔
ہر ضلع کیمپ میں آنے والے شرکا کے لیے خوراک، پینے کے پانی اور دیگر ضروری اشیا کے انتظامات کرے گا۔
پارٹی ذرائع کے مطابق 27 ستمبر کو اسلام آباد مارچ کا فیصلہ اٹل ہے، جبکہ کیمپ لگانے کا فیصلہ کارکنوں کو سہولیات فراہم کرنے کے لیے کیا گیا ہے۔ منصوبے کے مطابق جہاں بھی مارچ کا راستہ روکا گیا، وہیں دھرنا دیا جائے گا۔
خیبرپختونخوا کے وزیراعلیٰ سہیل آفریدی پشاور سے مارچ کی قیادت کریں گے۔
