سینکڑوں پاکستانیوں کو ڈی پورٹ کردیا گیا

دو دنوں میں مزید 100 سے زائد پاکستانیوں کو مختلف ممالک سے ڈی پورٹ کردیا گیا۔

گزشتہ 2 دنوں میں امریکا، جاپان، کوریا سینیگال، تھائی لینڈ سمیت 16 مختلف ممالک سے مزید 118 پاکستانیوں کو ڈی پورٹ کیا گیا جن میں سے کچھ کو کراچی پہنچنے پر گرفتار کر لیا گیا۔امیگریشن ذرائع کے مطابق سعودی عرب سے پاسپورٹ گم ہونے، بلیک لسٹ، معاہدے کی خلاف ورزی اور غیر قانونی کام کرنے کے الزامات پر 61 پاکستانیوں کو ڈی پورٹ کیا گیا۔

ذرائع کے مطابق غیر قانونی طور پر عراق میں داخل ہونے اور زائد المیعاد قیام پر 15 پاکستانیوں کو واپس بھیجا گیا جبکہ عمان سے 7 پاکستانیوں کو غیر قانونی طور پر داخل ہونے، آجر کی جانب سے ملازمت سے برطرف کرنے اور بلیک لسٹ ہونے پر واپس بھیجا گیا۔

ذرائع کے مطابق امریکا میں ایک پاکستانی کو ناقابل قبول قرار دے کر واپس بھیجا گیا، کوریا میں بھی ایک پاکستانی کو انٹری نہیں دی گئی جبکہ تھائی لینڈ میں ہوٹل کی بکنگ نہ ہونے اور اخراجات کی رقم کم ہونے پر 2 پاکستانیوں کو انٹری نہیں دی گئی۔ذرائع کا بتانا ہے کہ بحرین، یوگنڈا، کینیا، قبرص، مراکش، کوریا، سینیگال، بوٹسوانہ سے ایک ایک پاکستانی کو ڈی پورٹ کیا گیا جبکہ جاپان میں 2 پاکستانیوں کو وزٹ ویزا کے لئے مطمئن نہ کرسکنے اور ناقابل قبول قرار دے کر واپس بھیج دیا گیا۔