مظفرآباد: وزیراعظم آزاد حکومت ریاست جموں و کشمیر فیصل ممتاز راٹھور نے پاکستان پیپلز پارٹی آزاد کشمیر خواتین ونگ کے زیر اہتمام ممبرشپ مہم کا باضابطہ آغاز مظفرآباد سے کر دیا۔ اس موقع پر انہوں نے صدر خواتین ونگ آزاد کشمیر محترمہ شاہین کوثر ڈار، چیئرپرسن بینظیر انکم سپورٹ پروگرام و سینیٹر روبینہ خالد اور دیگر خواتین رہنماؤں کے ہمراہ ممبرشپ فارم بھر کر مہم کا افتتاح کیا۔
ممبرشپ مہم کے آغاز کے سلسلے میں سینٹرل پریس کلب مظفرآباد میں ایک کنونشن بھی منعقد ہوا، جہاں وزیراعظم کا پرتپاک استقبال کیا گیا۔ تقریب میں وزراء، پارٹی عہدیداران اور خواتین کارکنان کی بڑی تعداد شریک ہوئی۔
کنونشن سے خطاب کرتے ہوئے وزیراعظم فیصل ممتاز راٹھور نے کہا کہ پاکستان پیپلز پارٹی قربانیوں کی جماعت ہے، جس کی قیادت نے ہمیشہ قومی مفاد کو ترجیح دی۔ انہوں نے آصف علی زرداری کے کردار کو سراہتے ہوئے کہا کہ انہوں نے مشکل وقت میں “پاکستان کھپے” کا نعرہ لگا کر ملک کو بحران سے نکالا۔
انہوں نے کہا کہ آزاد کشمیر میں حکومت سنبھالنے کے بعد سیاسی استحکام بحال کیا گیا اور عوامی اعتماد کو دوبارہ قائم کیا گیا۔ ان کے مطابق پیپلز پارٹی واحد جماعت ہے جو ہر بحران میں ملک کو سنبھالنے کی صلاحیت رکھتی ہے۔
وزیراعظم نے خواتین کے کردار پر زور دیتے ہوئے کہا کہ پیپلز پارٹی نے خواتین کو وہ مقام دیا جو کسی اور جماعت نے نہیں دیا۔ انہوں نے بے نظیر بھٹو کا حوالہ دیتے ہوئے کہا کہ مسلم دنیا کی پہلی خاتون وزیراعظم ہونے کا اعزاز بھی پیپلز پارٹی کے پاس ہے۔
انہوں نے کہا کہ خواتین ممبرشپ مہم وقت کی اہم ضرورت ہے اور خواتین ونگ کو ہدایت کی کہ وہ پارٹی پیغام کو گھر گھر پہنچائیں اور نچلی سطح پر تنظیم سازی کو مضبوط بنائیں۔
وزیراعظم نے اپنی حکومت کی کارکردگی کا ذکر کرتے ہوئے کہا کہ مختصر عرصے میں عوامی مسائل کے حل، اوورسیز کشمیریوں کے لیے اقدامات، اور زرعی ترقی کے لیے کانفرنس جیسے اقدامات کیے گئے۔ انہوں نے یقین دلایا کہ حکومت عوامی فلاح کے لیے آخری وقت تک کام جاری رکھے گی اور آئندہ انتخابات میں کارکردگی کی بنیاد پر دوبارہ کامیابی حاصل کرے گی۔
انہوں نے عالمی سطح پر پاکستان کے کردار کو سراہتے ہوئے آصف علی زرداری، شہباز شریف اور عاصم منیر کو قیام امن کے لیے کردار ادا کرنے پر خراج تحسین پیش کیا۔
تقریب سے خطاب کرتے ہوئے سینیٹر روبینہ خالد نے کہا کہ پاکستان پیپلز پارٹی نظریہ بھٹو کی علمبردار جماعت ہے اور خواتین کو چاہیے کہ وہ پارٹی پیغام کو گھر گھر پہنچائیں۔
صدر خواتین ونگ آزاد کشمیر محترمہ شاہین کوثر ڈار نے کنونشن سے خطاب کرتے ہوئے کہا کہ ممبرشپ مہم کا مقصد خواتین کو سیاسی طور پر متحرک کرنا ہے۔ انہوں نے مقبوضہ کشمیر کی خواتین کو خراج تحسین پیش کرتے ہوئے بھارتی اقدامات کی مذمت کی اور پارٹی کی تنظیم سازی کے عزم کا اظہار کیا۔
تقریب سے دیگر مقررین نے بھی خطاب کیا اور خواتین کی سیاسی شمولیت کو ناگزیر قرار دیتے ہوئے ممبرشپ مہم کو خوش آئند قرار دیا۔ کنونشن میں پیش کی گئی قرارداد کو متفقہ طور پر منظور کیا گیا۔
تازہ ترین خبروں کے لیے پی این آئی کا فیس بک پیج فالو کریں
