گوگل کا پاکستان میں اے آئی پروفیشنل سرٹیفکیٹ کے آغاز کا اعلان

گوگل نے مصنوعی ذہانت (AI) کی مہارتوں میں بڑھتے ہوئے خلا کو کم کرنے کے لیے ایک نیا سرٹیفکیٹ پروگرام متعارف کرایا ہے۔ اس پروگرام کا مقصد پیشہ ور افراد کو عملی AI مہارتیں فراہم کرنا ہے تاکہ وہ اپنی روزمرہ پیشہ ورانہ سرگرمیوں میں AI کو مؤثر طریقے سے استعمال کر سکیں۔ یہ پروگرام بنیادی نظریات سے آگے بڑھ کر AI کے عملی استعمال پر توجہ مرکوز کرتا ہے۔

گوگل کے مطابق عالمی معیشت میں AI کی بڑھتی ہوئی اہمیت کے باعث ماہر افراد کی طلب میں اضافہ ہو رہا ہے، لیکن تربیت یافتہ افرادی قوت کی کمی ایک نمایاں مسئلہ بن چکی ہے۔ ایپسوس اور گوگل کی مشترکہ تحقیق کے مطابق تقریباً 70 فیصد منیجرز کا خیال ہے کہ کامیابی کے لیے AI میں تربیت یافتہ افرادی قوت کی اشد ضرورت ہے، جبکہ صرف 14 فیصد کارکنوں کو حقیقت میں AI کی تربیت کی پیشکش کی گئی ہے۔

یہ پروگرام ‘مشق کے ذریعے سیکھنے’ کے تصور پر مبنی ہے اور اس میں 20 سے زیادہ عملی سرگرمیاں شامل ہیں۔ شرکاء کو تین ماہ کے لیے گوگل AI پرو تک مفت رسائی دی جاتی ہے، جس کے ذریعے وہ گوگل کے جدید ترین AI ماڈلز کے ساتھ براہ راست مشق کر سکتے ہیں اور انہیں گوگل ڈوکس، جی میل اور گوگل شیٹس میں استعمال کر سکتے ہیں۔

یہ سرٹیفکیٹ پروگرام 6 جامع کورسز اور ایک حتمی پروجیکٹ پر مشتمل ہے، جو گوگل کے ماہرین اور AI پیشہ ور افراد کی جانب سے تیار کیا گیا ہے۔ یہ پروگرام مصروف پیشہ ور افراد کے لیے ڈیزائن کیا گیا ہے اور اسے اپنی رفتار کے مطابق 10 گھنٹوں سے بھی کم وقت میں مکمل کیا جا سکتا ہے۔ پروگرام مکمل کرنے کے بعد شرکاء کو ڈیجیٹل سرٹیفکیٹ فراہم کیا جاتا ہے جسے وہ لنکڈ ان جیسے پلیٹ فارمز پر اپنی پیشہ ورانہ پروفائل میں شامل کر سکتے ہیں۔

گوگل کے مطابق یہ نصاب حقیقی دنیا میں دستیاب ملازمتوں کے ڈیٹا کی بنیاد پر تیار کیا گیا ہے اور معروف آجرین کی جانب سے اس کی توثیق بھی کی گئی ہے۔