تعطیل کا اعلان

خیرپور میں 4 مارچ 2026 کو عام تعطیل کا اعلان کر دیا گیا ہے۔ ضلعی انتظامیہ کے جاری کردہ نوٹیفکیشن کے مطابق صوفی بزرگ سچل سرمست کے سالانہ عرس کے موقع پر ضلع بھر کے تمام سرکاری اور نیم سرکاری دفاتر بند رہیں گے۔

انتظامیہ کا کہنا ہے کہ سچل سرمستؒ کے 205ویں عرس کی تقریبات کا باقاعدہ آغاز 14 رمضان المبارک سے ہوگا۔ ہر سال کی طرح اس موقع پر ملک بھر سے عقیدت مندوں کی بڑی تعداد درگاہ پر حاضری دے گی اور مختلف مذہبی و ثقافتی تقاریب کا انعقاد کیا جائے گا۔ دوسری جانب حکومتِ سندھ نے صوبے میں ہندو برادری کے سرکاری ملازمین کے لیے ہولی کے تہوار کے سلسلے میں 3 اور 4 مارچ 2026 کو دو روزہ تعطیل کا اعلان کیا ہے۔ اس فیصلے کا مقصد ہندو ملازمین کو اپنے مذہبی اور ثقافتی تہوار بھرپور انداز میں منانے کا موقع فراہم کرنا ہے۔

یوں 4 مارچ کو خیرپور میں ایک طرف عرس کی روحانی تقریبات ہوں گی تو دوسری جانب ہندو برادری ہولی کی خوشیاں منائے گی۔ یہ اعلان صوبے میں صوفی روایت کے احترام اور اقلیتوں کے مذہبی حقوق کے تحفظ کی عکاسی کرتا ہے۔