جیکب آباد کے قریب سلطان کوٹ اور آباد اسٹیشن کے درمیان ریلوے ٹریک پر دھماکہ ہوا، جس کے نتیجے میں جعفر ایکسپریس کی تین بوگیاں متاثر ہوئیں۔
ایکسپریس نیوز کے مطابق ریلوے حکام نے بتایا کہ دھماکہ صبح 10 بج کر 20 منٹ پر اس وقت ہوا جب جعفر ایکسپریس ٹریک عبور کر رہی تھی، جس کے نتیجے میں تین بوگیاں پٹڑی سے اتر گئیں۔ ابتدائی اطلاعات کے مطابق کوئی جانی نقصان نہیں ہوا، تاہم متعدد افراد زخمی ہوئے ہیں۔ امدادی ٹیمیں فوری طور پر موقع پر روانہ کر دی گئی ہیں۔
وزیراعلیٰ سندھ مراد علی شاہ نے واقعے کا نوٹس لیتے ہوئے زخمیوں کو فوری طبی امداد فراہم کرنے کی ہدایت کی ہے اور دھماکے کی مکمل تحقیقات کا حکم دیا ہے۔ انہوں نے کہا کہ یہ دھماکہ ریاست کے خلاف سازش ہے اور ذمہ داروں کو ہرگز معاف نہیں کیا جائے گا۔
دھماکے کے بعد ریلوے ٹریفک متاثر ہوئی ہے اور دیگر ٹرینوں کی آمد و رفت عارضی طور پر معطل کر دی گئی ہے۔ وزیراعلیٰ سندھ نے متعلقہ حکام کو ہدایت دی ہے کہ ملزمان کو قانون کے کٹہرے میں لایا جائے اور ٹریک کی بحالی کا عمل جلد مکمل کیا جائے۔
تازہ ترین خبروں کے لیے پی این آئی کا فیس بک پیج فالو کریں
