معروف اداکارہ کے شوہر اہم کیس میں گرفتار

ویب ڈیسک (پی این آئی)وفاقی تحقیقاتی ادارے (ایف آئی اے) نے معروف پاکستانی اداکارہ و ماڈل نادیہ حسین کے شوہر عاطف احمد خان کو بینک فراڈ کیس میں گرفتار کرلیا۔

ایف آئی اے کارپوریٹ کرائم سرکل نے اداکارہ نادیہ حسین کے گھر چھاپہ مار کارروائی کرتے ہوئے ان کے شوہر اور سابق سی ای او بینک الفلاح سیکیورٹیز عاطف احمد خان کو گرفتار کرلیا۔ نادیہ حسین کے خاوند کو بینک الفلاح سیکورٹیز بورڈ آف ڈائریکٹرز کی شکایت پر تحقیقات کے بعد گرفتار کیا گیا، ملزم کارپوریٹ فنانشل فراڈ کے ذریعے کمپنی فنڈز کی خورد برد میں ملوث ہے۔ایف آئی اے نے بتایا کہ ملزم پر الزام ہے کہ انہوں نے نجی بینک کے ساتھ کروڑوں روپے کا فراڈ کیا ہے، ملزم کی جانب سے 80 ملین ( 8 کروڑ) کے کمپنی فنڈز کو ذاتی ٹریڈنگ کے لیے استعمال کیا گیا۔علاوہ ازیں ملزم نے تھرڈ پارٹی کے لگ بھگ 60 کروڑ روپے غیرقانونی طور پر ایکوائر کیے اور کمپنی فنڈز سے انہیں ہائی مارک اپ کے ساتھ ادائیگی کی گئی۔

ایف آئی اے کے مطابق بینک کے بورڈ آف ڈائریکٹرز کی شکایت پر تحقیقات کے بعد عاطف احمد کو گرفتار کیا گیا ہے۔ملزم کو سابق سی ایف او فیصل شیخ اور اور امتیاز احمد نے فراڈ میں سہولیات فراہم کیں، ملزم سے تفتیش کے بعد مزید حقائق سامنے لائے جائیں گے۔اپنے شوہر پر سنگین الزامات اور گرفتاری کے باوجود نادیہ حسین نے تاحال اس معاملے پر کوئی بیان جاری نہیں کیا ہے۔اداکارہ اور ماڈل نادیہ حسین نے 2003 میں عاطف خان سے شادی کی تھی، اور اس جوڑے کے 4 بچے ہیں۔