بالی ووڈ کے معروف اداکار امیتابھ بچن کے ایک جملے کے بعد سوشل میڈیا پر ان کی ریٹائرمنٹ سے متعلق قیاس آرائیاں شروع ہوگئیں، تاہم 83 سالہ اداکار نے واضح کردیا ہے کہ ان کا اداکاری یا ٹیلی ویژن سے ریٹائر ہونے کا کوئی ارادہ نہیں۔
امیتابھ بچن نے ایک اخباری تراشہ شیئر کیا جس میں ان کی ریٹائرمنٹ سے متعلق خبر شائع ہوئی تھی۔ انہوں نے وضاحت کرتے ہوئے بتایا کہ اپنے بلاگ میں انہوں نے لکھا تھا کہ ’’دیر ہوگئی ہے، ریٹائر ہونے کا وقت آگیا ہے‘‘، تاہم اس جملے کا مطلب وہ نہیں تھا جو خبر میں اخذ کیا گیا۔
اداکار کے مطابق ان کے الفاظ کا تعلق اداکاری یا ٹیلی ویژن سے ریٹائرمنٹ سے نہیں بلکہ دن بھر کے کام کے اختتام سے تھا۔ ان کا مطلب صرف یہ تھا کہ کافی دیر ہوچکی ہے اور اب سونے کا وقت ہے۔
امیتابھ بچن نے اپنے مخصوص مزاحیہ انداز میں وضاحت کی کہ ’’ریٹائر‘‘ سے مراد کام ختم کرکے آرام اور نیند کے لیے جانا تھا۔ انہوں نے اس موقع پر مزاحاً یہ بھی واضح کیا کہ کسی معزز شخصیت کے استقبال کی دعوت نہیں دی جارہی۔
یوں اداکار نے خود ہی ریٹائرمنٹ سے متعلق خبروں کی تردید کردی اور واضح کیا کہ وہ بدستور اپنے کام میں مصروف ہیں۔
امیتابھ بچن اس وقت مقبول ٹی وی گیم شو ’’کون بنے گا کروڑ پتی‘‘ کے 18ویں سیزن کی میزبانی کررہے ہیں۔ یہ پروگرام پہلی مرتبہ 2000ء میں نشر ہوا تھا اور وقت کے ساتھ بھارتی ٹیلی ویژن کے مقبول شوز میں شامل ہوگیا۔
