مینارِپاکستان جلسہ، پی ٹی آئی کا اجازت نہ ملنے کی صورت میں پلان بی تیار

لاہور (پی این آئی) پاکستان تحریک انصاف نے مینار پاکستان جلسے کی اجازت نہ ملنے کی صورت میں پلان بی تیار کرلیا۔

میڈیا رپورٹس کے مطابق ذرائع نے بتایا ہے کہ پی ٹی آئی نے 8 فروری کو مینار پاکستان پر جلسے کی اجازت نہ ملنے کی صورت میں پنجاب کے تمام اضلاع میں احتجاج کرنے کا فیصلہ کیا ہے، اس حوالے سے پارٹی کے تمام ارکانِ اسمبلی اور رہنماؤں کو اپنے حلقوں میں احتجاج کرنے کی ہدایت بھی کی جائے گی، جلسے کی اجازت نہ ملنے کی صورت میں لاہور کے اہم مقامات لبرٹی چوک، آزادی چوک اور مال روڈ پر احتجاج کیا جائے گا اور تمام حلقوں میں احتجاجی ریلیاں بھی نکالی جائیں گی۔

بتایا جارہا ہے کہ پی ٹی آئی نے 8 فروری کو مینار پاکستان پر جلسے کا اعلان کیا ہوا ہے، جس کے بارے میں پی ٹی آئی پنجاب کی چیف آرگنائزر عالیہ حمزہ نے کہا کہ 8 فروری کو ہمارے مینڈیٹ پرشب خون مارا گیا، ہم اس کے خلاف مینار پاکستان پر جلسہ کریں گے، اس حوالے سے لاہور میں ڈپٹی کمشنر آفس میں درخواست بھی جمع کروائی، تاہم اس پر کارروائی نہ ہونے کے سبب لاہور ہائی کورٹ سے رجوع کرتے ہوئے مینار پاکستان پر جلسے کے لیے درخواست دائر کردی ہے۔