اسلام آباد (پی این آئی) برطانیہ کی معروف پاپ گلوکارہ اور نغمہ نگار ماریان فیتھ فل 78 سال کی عمر میں انتقال کر گئیں۔
ان کی موت کی تصدیق ان کی موسیقی کی تشہیری کمپنی ’ریپبلک میڈیا‘ نے کی، جس میں کہا گیا کہ ”انتہائی افسوس کے ساتھ اعلان کیا جاتا ہے کہ گلوکارہ، نغمہ نگار اور اداکارہ ماریان فیتھ فل کا انتقال ہو چکا ہے۔“ماریان فیتھ فل کا موسیقی کیریئر 1964 میں اس وقت شروع ہوا جب انہوں نے ایک پارٹی میں رولنگ سٹونز کے مینیجر سے ملاقات کی۔ محض 17 سال کی عمر میں انہوں نے اپنا مشہور گانا ”ایز ٹیئرز گو بائی“ ریکارڈ کیا، جو نہ صرف برطانیہ بلکہ امریکہ میں بھی کامیاب رہا۔ اس کے بعد انہوں نے متعدد ہٹ گانے اور دو البمز جاری کیے۔
ان کے انتقال پر مختلف فنکاروں اور ساتھی گلوکاروں کی جانب سے دکھ اور افسوس کا اظہار کیا جا رہا ہے۔ معروف گلوکار میک جیگر نے ماریان فیتھ فل کی موت پر اظہار افسوس کرتے ہوئے کہا، ”وہ میری زندگی کا طویل حصہ رہیں، ایک بہترین دوست، خوبصورت گلوکارہ اور عظیم اداکارہ تھیں۔“ماریان کی زندگی اتار چڑھاؤ سے بھری رہی۔ انہوں نے منشیات کی لت کا سامنا کیا اور کچھ عرصہ بے گھر بھی رہیں۔ تاہم، 1979 میں البم ”بروکن انگلش“ سے انہوں نے شاندار واپسی کی اور بعد ازاں اپنی زندگی کو بہتر بنانے میں کامیاب ہوئیں۔ ماریان نے اپنی زندگی کو ایک غیر معمولی تجربہ قرار دیتے ہوئے اس سے بہت کچھ سیکھا۔
تازہ ترین خبروں کے لیے پی این آئی کا فیس بک پیج فالو کریں
