امریکا سے آکر خاتون نے سندھ کے اسپتال سے آپریشن کروالیا

کراچی(پی این آئی) امریکا سے آکر خاتون نے سندھ کے گمبٹ میڈیکل انسٹی ٹیوٹ میں کامیاب آپریشن کروالیا۔اے آر وائی نیوز کے مطابق امریکی خاتون جولی نیمن نے سندھ کے گمبٹ میڈیکل انسٹیوٹ میں علاج کے لیے آن لائن رجسٹریشن کروائی۔گمبٹ انسٹی ٹیوٹ آف میڈیکل سائنسز میں امریکی خاتون کے جگر کا کامیاب آپریشن کیا گیا۔ امریکی خاتون نے کہاکہ اگر یہ علاج امریکا میں کراتی تو مہینوں لگ جاتے یہاں اسپتال میں علاج کی بہترین اور سستی سہولتیں فراہم کی گئیں۔ جولی نیمن نے کہاکہ یہ اسپتال اعلی درجے کا ہے

اور یہ دنیا بھر کے ان تمام اسپتالوں سے بہتر ہے جہاں میں جاچکی ہوں، یہ اسپتال پاکستان کے لیے فخر کا باعث ہے۔ انہوں نے کہاکہ یہاں میری سرجری فوری شیڈول ہوگئی میرے ملک میں یہ سرجری کروانا وقت طلب مرحلہ ہوتا ہے، میں نے یہاں چھوٹی بچیوں کو بھی جگر کے علاج کے لیے دیکھا ہے جبکہ امریکا میں بچوں کو سالوں درد کش ادویات پر رکھا جاتا ہے۔ امریکی خاتون نے کہاکہ یہاں گمبٹ میں علاج معالجہ اور ٹیسٹ بہت سستے ہیں اور یہ بہترین ہیلتھ کیئر سسٹم ہے۔