شہباز گل نے بڑے لیڈر کو “پرچی چیئرمین” قرار دےد یا

اسلام آباد (آئی این پی ) وزیر اعظم کے معاون خصوصی برائے سیاسی ابلاغ ڈاکٹر شہباز گل نے کہا ہے کہ پرچی چیئرمین بھاشن بازی سے پہلے پیپلزپارٹی کی آئی ایم ایف سے قرض کی تاریخ دیکھیں۔ شہباز گل نے بلاول بھٹو زرداری کے بیان پر ردعمل دیتے ہوئے کہا کہ پرچی چیئرمین کی بوکھلاہٹ معیشت درست سمت کی غماز ہے، ماضی کی نالائق حکمرانوں نے قرض پہ قرض لیا، گزشتہ 40 برس میں معیشت کھڑی کرنے کیلئے کام کیا جاتا تو آج پاکستان بدحالی کا شکار نہ ہوتا۔ شہباز گِل کا کہنا تھا کہ تحریک انصاف نے اپنے ڈھائی سال میں 35 ہزار ارب روپے کا قرض اور سود واپس کیا، ماضی کی قرضوں کی واپسی کے ساتھ ساتھ معیشت کو بھی پاں پر کھڑا کیا۔۔۔۔۔

وفاقی سیکریٹری داخلہ نے غیر مشروط معافی مانگ لی

کراچی(آئی این پی ) سندھ ہائیکورٹ نے لاپتا افراد کی بازیابی سے متعلق درخواستوں سے متعلق وفاقی سیکریٹری داخلہ کو لاپتہ افراد سے متعلق جامع رپورٹ جمع کرانے کا حکم دیدیا۔تفصیلات کے مطابق جسٹس کے کے آغا اور جسٹس عبد المبین لاکھو پر مشتمل دو رکنی بینچ کے روبرو لاپتا افراد کی بازیابی سے متعلق درخواستوں کی سماعت ہوئی۔ عدالتی حکم کے بعد وفاقی سیکرٹری داخلہ، ڈائریکٹر ہیومن رائٹس، اٹارنی جنرل آف پاکستان اور دیگر پیش ہوگئے۔ عدم پیشی پر وفاقی سیکریٹری داخلہ نے عدالت سے غیر مشروط معافی مانگ لی۔ وفائی سیکریٹری داخلہ نے شوکاز نوٹس کا جواب بھی جمع کرادیا۔ عدالت نے وفاقی سیکریٹری داخلہ سے استفسار کیا آپ عدالتی فیصلوں پر عمل درآمد کیوں نہیں کرتے؟ عدالت کو جواب کے لیے بار بار نوٹس جاری کرنا پڑتے ہیں۔ جسٹس کے کے آغا نے ریمارکس دیئے یہاں لوگ پریشان ہیں اور عدالت کی جانب دیکھتے ہیں۔ جواب جمع نہ ہونے پر کیسز غیر ضروری التوا کا شکار ہیں۔ عدالت نے استفسار کیا کہ یہ بتائیں، حراستی مراکز کس کے زیر انتظام ہیں؟۔ وفاقی سیکریٹری داخلہ نے بتایا کہ حراستی مراکز کے پی کے حکومت کے زیر انتظام ہیں۔ لاپتہ افراد سے متعلق لسٹ سپریم کورٹ میں بھی جمع کرا چکے۔ عدالت نے استفسار کیا اگر لسٹیں موجود ہیں تو چیک کرکے جواب جمع کیوں نہیں کرایا جاتا؟ نام چیک کریں اور بتا دیا کریں مذکورہ شخص پاس ہے یا نہیں۔ جبری گمشدگی کا مسئلہ انتہائی اہم ہے، اسے ختم کرنا ہوگا۔ اٹارنی جنرل آف پاکستان نے موقف دیا کہ انسانی حقوق کی بنیادوں پر وفاقی حکومت کام کررہی ہے۔ خیبر پختونخواہ کے حراستی مرکز میں سندھ سے لاپتا ہونے والے تین افراد کی نشاندہی ہوئی ہے۔ سندھ سے لاپتا ہونے والے دیگر افراد کا سراغ نہیں لگایا جاسکا۔ وفاقی حکومت ترجیح بنیادوں پر اس معاملے کو دیکھ رہی ہے۔ جسٹس کے کے آغا نے ریمارکس دیئے ہم نے حکم کی تعمیل نہ ہونے پر وفاقی سیکریٹری داخلہ کے ناقابلِ ضمانت وارنٹ گرفتاری جاری کیے۔ امید کرتے ہیں مستقبل میں وفاقی سیکریٹری داخلہ عدالتی حکم کو نظر انداز نہیں کریں گے۔ عدالت نے ہدایت کی لاپتہ افراد کی بازیابی سے متعلق تمام وسائل بروئے کار لائے جائیں۔ وفاقی سیکریٹری داخلہ آئندہ سماعت پر بھی خود پیش ہوں۔ عدالت نے وفاقی سیکریٹری داخلہ کو عدالتی فیصلوں پر عمل درآمد کرنے اور لاپتہ افراد سے متعلق جامع رپورٹ جمع کرانے کا حکم دیتے ہوئے سماعت 24 اگست تک ملتوی کردی۔۔۔۔