عوامی پیسے کا غلط استعمال، وزیر خزانہ کو گرفتار کر لیا گیا

قطر (پی این آئی ) قطر کے وزیر خزانہ علی شریف العمادی کو کرپشن، اختیارات اور عوامی فنڈز کے غلط استعمال کے الزام میں گرفتار کر لیا گیا ہے۔خبر رساں ایجنسی اے ایف پی کے مطابق گوکہ قطر میں اس سے قبل بھی بدعنوانی کے سلسلے میں اعلیٰ سطح پر گرفتاریاں عمل میں لائی جا چکی ہیں تاہم سرکاری ذرائع نے بتایا کہ امیر شیخ تمیم بن حماد کی حکمرانی میں عمادی اس طرح کے الزامات کا سامنا کرنے والی اعلیٰ ترین شخصیت ہیں۔سرکاری میڈیا کے مطابق اٹارنی جنرل نے وزیر خزانہ علی شریف العمادی کی گرفتاری کا حکم دیا تاکہ ان سے عوامی پیسے کے غلط استعمال، اختیارات اور طاقت کے غلط استعمال کے حوالے سے رپورٹس کے بارے میں تفتیش کی جا سکے۔قطر کی سرکاری خبر رساں ایجنسی نے بتایا ہے کہ تحقیقات کا آغاز کردیا گیا ہے تاہم انہوں نے اس حوالے سے مزید تفصیلات فراہم نہیں کیں۔عمادی 2013 سے وزیر خزانہ کی حیثیت سے خدمات انجام دے رہے ہیں، وہ قومی فضائیہ قطر ایئر ویز کے ایگزیکٹو بورڈ کے صدر اور قطر نیشنل بینک کے بورڈ کے چیئرمین بھی ہیں۔قطر میں مقیم ایک سفارت کار نے بتایا کہ یہ گرفتاری بالکل غیر متوقع تھی۔سفارت کار نے مزید کہا کہ حکومتوں کا قوانین کی پاسداری کرتے ہوئے بدعنوانی اور اختیارات کے ناجائز استعمال پر سخت کارروائی کرنا خوش آئند ہے۔دوحہ میں مقیم ایک اور سفارتکار نے اے ایف پی کو بتایا یہ حقیقتاً بہت اچھا ہے، اس سے یہ ظاہر ہوتا ہے کہ قطر بدعنوانی کو سنجیدگی سے لے رہا ہے، اگر تحقیقات میں یہی بات سامنے آتی ہے تو اور قانون کی حکمرانی کی تعمیل کے حوالے سے قطر کو اپنا تشخص بہتر بنانے میں مدد ملے گی۔گیس سے مالا مال قطر عرب کی چھوٹی ریاستوں میں سے ایک ہے جس کی آبادی 28 لاکھ نفوس پر مشتمل ہے جن میں سے زیادہ تر غیرملکی ہیں۔