صورتحال دن بدن بہتری کی جانب گامزن ،کورونا کے کتنے فیصد پاکستانی مریض صحتیاب ہو چکے ہیں اور کتنے ایکٹو کیسز موجود ہیں؟ تفصیلی رپورٹ آگئی

اسلام آباد(پی این آئی) پاکستان میں کورونا وائرس کی صورتحال دن بدن بہتری کی جانب گامزن ہے اور ملک میں 2 لاکھ 77 ہزار 63 کیسز میں 2 لاکھ 44 ہزار 883 صحتیاب ہوچکے ہیں جو تقریبا 88 فیصد سے زائد ہے۔اس کے علاوہ ملک میں مجموعی طور پر اموات کی تعداد 5 ہزار 915 ہے جبکہ فعال کیسز 26 ہزار سے

زائد رہ گئے ۔تفصیلات کے مطابق 29 جولائی کو ملک میں کورونا وائرس کے مزید 1020 کیسز اور 34 اموات کا اضافہ ہوا جبکہ 2 ہزار 447 لوگ مزید شفایاب بھی ہوگئے ہیں جبکہ جبکہ فعال کیسز 26 ہزار سے زائد رہ گئے ۔خیال رہے کہ جولائی کے مہینے سے ملک میں کورونا کیسز کی تعداد میں کمی دیکھی جارہی ہے جبکہ صحتیاب افراد کی تعداد میں اضافہ دیکھنے میں آیا ہےتاہم حکومتی عہدیدار کورونا کی صورتحال میں بہتری کے باوجود عوام کو خبردار کررہے ہیں کہ عیدالاضحی اور محرم الحرام کے موقع پر احتیاطی تدابیر لازمی اپنائیں ورنہ صورتحال دوبارہ سے خراب ہوسکتی ہے۔واضح رہے کہ پاکستان میں کورونا وائرس کا پہلا کیس 26 فروری کو ملک کے سب سے بڑے شہر کراچی میں سامنے آیا تھا جس کے بعد یہ پورے ملک میں پھیل گیا اور اس 5 ماہ سے زائد کے عرصے میں اس وبا کی وجہ سے تعلیمی اداروں سمیت کاروبار کی بندشوں تک کا سامنا کرنا پڑا۔اگر اس وقت کی صورتحال پر نظر ڈالیں تو 29 جولائی کو کیسز اور اموات کے بعد مجموعی تعداد کچھ اس طرح ہے۔سندھ میں کورونا وائرس کے مزید 654 نئے کیسز اور 17 اموات کا اضافہ ہوا۔وزیراعلی سندھ کے مطابق صوبے میں گزشتہ 24 گھنٹوں میں 654 افراد کے متاثر ہونے سے مجموعی تعداد ایک لاکھ 20 ہزار 52 ہوگئی۔انہوں نے بتایا کہ صوبے میں مزید 17 اموات بھی ہوئیں جس سے یہ تعداد 2 ہزار 189 تک پہنچ گئی۔صوبہ پنجاب میں کورونا وائرس نے مزید 173 افراد کو متاثر کیا جبکہ 8 افراد زندگی کی بازی ہار گئے۔سرکاری سطح پر قائم پورٹل کے مطابق صوبے میں ان نئے 173 کیسز کے بعد مجموعی کیسز 92 ہزار 452 تک پہنچ گئے۔مزید برآں صوبے میں مزید 8 اموات نے مجموعی تعداد کو 2 ہزار 133 تک پہنچا دیا۔وفاقی دارالحکومت اسلام آباد کورونا وبا نے مزید 25 افراد کو متاثر کردیا۔سرکاری اعداد و شمار کے مطابق ان نئے کیسز کے بعد دارالحکومت میں کیسز کی مجموعی تعداد 14 ہزار 963 تک جا پہنچی۔محکمہ صحت خیبر پختونخوا نے کورونا کے 121 نئے کیسز کی تصدیق کی جس کے بعد صوبے میں متاثرین کی تعداد 33 ہزار 845 ہوگئی۔صوبے میں وائرس مزید 6 مریضوں کی جان لے گیا جس کے بعد

یہاں اموات کی تعداد 1192 ہوگئی ہے۔ملک میں دوسرے نمبر پر کم متاثرہ علاقے آزاد کشمیر میں کورونا وبا کے مزید 15 کیسز اور ایک موت کی تصدیق ہوئی۔اعداد و شمار کے مطابق آزاد کشمیر میں وائرس نے مزید 15 لوگوں کو متاثر کیا جس سے مجموعی کیسز 2 ہزار 55 تک پہنچ گئے۔اس کے علاوہ ایک فرد کے انتقال کرنے سے یہ تعداد 50 تک جاپہنچی۔ملک میں اس وقت سب سے کم متاثر علاقے گلگت بلتستان میں کورونا وبا نے مزید 32 افراد کو متاثر کیا اور 2 افراد جان کی بازی ہار گئے۔پورٹل کے مطابق 32 افراد کے متاثر ہونے کے بعد کیسز کی مجموعی تعداد 2 ہزار 42 ہوگئی۔اس کے علاوہ 2 افراد کے انتقال کرجانے سے مجموعی اموات کی تعداد 50 تک پہنچ گئی۔پاکستان میں صحتیاب افراد کی تعداد تیزی سے بڑھ رہی ہے جو دیگر فعال کیسز کے لیے امید کی کرن ہے۔اس وقت ملک میں 88 فیصد لوگ شفایاب ہوچکے ہیں جبکہ گزشتہ 24 گھنٹوں میں مزید 2 ہزار 447 لوگ ایسے تھے جنہوں نے اس وائرس سے شفا پائی جس کے بعد اب تک مجموعی طور پر صحتیاب ہونے والوں کی تعداد 2 لاکھ 44 ہزار 883 ہوگئی۔ملک میں عالمی وبا کے کیسز، اموات اور

صحتیاب افراد کی تعداد میں اضافے کے بعد مصدقہ کیسز 277063 ہیں جبکہ اموات5915 ہوئیں۔صحتیاب افراد کی تعدا 244883 جبکہ فعال کیسز 26265 ہیں۔ملک میں اس وائرس سے سب سے زیادہ متاثر صوبے سندھ اور پنجاب ہیں، صوبہ سندھ میں کیسز ایک لاکھ 20 ہزار 52 ہیں تو وہیں پنجاب میں یہ تعداد 92 ہزار 452 کیسز تک پہنچ چکی ہے۔صوبہ خیبرپختونخوا میں کورونا وائرس سے 33 ہزار 845 افراد متاثر ہوچکے ہیں جبکہ صوبہ بلوچستان میں وبا میں مبتلا ہونے والوں کی تعداد 11 ہزار 654 ہے۔علاوہ ازیں وفاقی دارالحکومت اسلام آباد میں 14 ہزار 963، آزاد کشمیر میں 2055 اور گلگت بلتستان 2042 افراد عالمی وبا کا شکار ہوچکے ہیں۔ملک میں اموات کی صورتحال کچھ یوں ہے، سندھ 2189،پنجاب 2133،خیبرپختونخوا 1192،بلوچستان 136،اسلام آباد 165،آزاد کشمیر 50،گلگت بلتستان میں 50 اموات ہوئیں۔