*میٹا نے آسٹریلیا میں 7 لاکھ 56 ہزار سے زائد بچوں کے فیس بک اور انسٹاگرام اکاؤنٹس بند کر دیے
سڈنی: سوشل میڈیا کمپنی میٹا نے آسٹریلیا میں عمر کی حد سے متعلق قانون پر عمل درآمد کرتے ہوئے 7 لاکھ 56 ہزار سے زیادہ اکاؤنٹس معطل کر دیے ہیں۔
کمپنی کے مطابق یہ تمام اکاؤنٹس 16 سال سے کم عمر صارفین کے تھے۔ میٹا نے بتایا کہ گزشتہ سال دسمبر سے رواں سال جون تک انسٹاگرام کے 4 لاکھ 62 ہزار اور فیس بک کے 2 لاکھ 94 ہزار مشکوک اکاؤنٹس کو بند کیا گیا۔
میٹا کا کہنا ہے کہ ان اکاؤنٹس کی شناخت کے لیے مصنوعی ذہانت کا نظام استعمال کیا جا رہا ہے۔ اس سسٹم میں صارف کے پروفائل اور پوسٹس کا جائزہ لیا جاتا ہے۔ مثال کے طور پر سالگرہ کے پیغامات یا اسکول کی کلاسوں کا ذکر جیسے اشارے عمر کا تعین کرنے میں مدد دیتے ہیں۔
یہ اقدام آسٹریلیا کی حکومت کی جانب سے نافذ کیے گئے قانون کے تحت اٹھایا گیا ہے۔ حکومت نے بچوں کی جسمانی اور ذہنی صحت پر سوشل میڈیا کے اثرات کے پیش نظر 16 سال سے کم عمر بچوں کے لیے سوشل میڈیا کے استعمال پر پابندی عائد کی تھی۔
تاہم سرکاری اعداد و شمار اور آزاد تحقیقات سے پتا چلا ہے کہ قانون نافذ ہونے کے ابتدائی تین مہینوں میں بھی 16 سال سے کم عمر کے 80 فیصد سے زائد بچے کسی نہ کسی طریقے سے سوشل میڈیا استعمال کرتے رہے۔
دوسری جانب آسٹریلین انٹرنیٹ ریگولیٹر اتھارٹی ان سوشل میڈیا کمپنیوں کے خلاف سخت قانونی کارروائی پر غور کر رہی ہے جن کے بارے میں اس کا خیال ہے کہ انہوں نے پابندی کے نفاذ کے لیے مناسب اقدامات نہیں کیے۔
#میٹا #فیس_بک #انسٹاگرام #آسٹریلیا #سوشل_میڈیا_پابندی #بچوں_کی_حفاظت #AI #Meta #BreakingNews
