گھر بیٹھے سستی اور معیاری اشیائے خوردونوش کی خوشخبری

لاہور: وزیراعلیٰ پنجاب مریم نواز شریف کے فری ہوم ڈیلیوری پراجیکٹ نے عوامی خدمت کے نئے ریکارڈ قائم کر دیے ہیں۔

یہ پنجاب میں سرکاری سطح پر اشیائے خوردونوش کی گھر تک سب سے معیاری اور سستی فراہمی کا پہلا منصوبہ ہے۔ صوبے کے 35 شہروں میں قائم 46 سہولت بازاروں کے ذریعے یہ سروس جاری ہے۔ اب تک تین لاکھ بارہ ہزار سے زائد آرڈرز کامیابی سے ڈیلیور کیے جا چکے ہیں۔ پراجیکٹ کے تحت 13 بنیادی اشیائے خوردونوش کو ڈپٹی کمشنر کے نوٹیفائیڈ ریٹس سے بھی کم قیمت پر فراہم کیا جا رہا ہے۔ شہری اب ڈی سی ریٹ سے 7 فیصد تک کم قیمت پر آلو، پیاز، ٹماٹر، کدو، لہسن، سیب، کیلا، کھجور، لیموں، امرود، دال چنا، بیسن، آٹا اور چینی گھر بیٹھے حاصل کر سکتے ہیں۔

آرڈر کے لیے گوگل پلے اسٹور اور ایپل ایپ سٹور پر فری ہوم ڈیلیوری ایپ دستیاب ہے، جبکہ پنجاب سہولت بازار اتھارٹی کے رائیڈرز آرڈرز گھر گھر پہنچا رہے ہیں۔ اس سہولت سے شہریوں کو اب تک 110 ملین روپے کی بچت ہوئی ہے۔ وزیراعلیٰ پنجاب مریم نواز شریف نے کہا، “مہنگائی کے اثرات کسی صورت عوام تک نہیں پہنچنے دیں گے۔ فری ہوم ڈیلیوری پراجیکٹ کے دائرہ کار کو بتدریج پنجاب کے دیگر شہروں تک وسعت دی جائے گی۔”