پشاور: وزیراعلیٰ خیبر پختونخوا علی امین گنڈاپور نے کہا ہے کہ بانی پاکستان تحریک انصاف (پی ٹی آئی) کو ایک سازش کے تحت حکومت سے ہٹایا گیا اور اُنہیں پاکستان کو خودمختار بنانے کی سزا دی جا رہی ہے۔
اپنے ایک بیان میں علی امین گنڈاپور کا کہنا تھا کہ بانی پی ٹی آئی کا پیغام ہر ضلع، ہر یونین کونسل اور ہر فرد تک پہنچایا جا رہا ہے، جبکہ مختلف علاقوں میں ریلیوں اور عوامی ملاقاتوں کا سلسلہ بھی جاری ہے۔ انہوں نے کہا کہ بانی پی ٹی آئی کو غیرآئینی اور غیرقانونی طور پر قید کیا گیا ہے، جسے ہم تسلیم نہیں کرتے۔ ان کو دبانے کی کوشش میں بشریٰ بی بی کو بھی ناحق قید کیا گیا ہے۔
وزیراعلیٰ کا مزید کہنا تھا کہ موجودہ فسطائیت کے باوجود بانی پی ٹی آئی آئین و قانون کی بات کر رہے ہیں۔ ان کو توڑنے کی کوشش کرنے والے خود ٹوٹ جائیں گے، کیونکہ عوام آج بھی ان کے ساتھ کھڑے ہیں۔ انہوں نے دوٹوک الفاظ میں کہا کہ ہم کسی غیرآئینی اور غیرقانونی عمل کو تسلیم نہیں کرتے، کیونکہ بانی پی ٹی آئی ہماری نسلوں کی آزادی کی جنگ لڑ رہے ہیں۔ ہم اُن کے ساتھ چٹان کی طرح کھڑے ہیں اور پیچھے ہٹنے کا سوال ہی پیدا نہیں ہوتا۔ بانی پی ٹی آئی سے بڑھ کر ہمارے لیے کچھ نہیں، یہی ہمارا نظریہ ہے۔
تازہ ترین خبروں کے لیے پی این آئی کا فیس بک پیج فالو کریں
