لوڈشیڈنگ، کے الیکٹرک اور دیگر کو نوٹس جاری

للوڈشیڈنگ، کے الیکٹرک اور دیگر کو نوٹس جاری۔۔۔۔۔۔۔۔ کراچی: سندھ ہائیکورٹ نے لائن لاسز کی بنیاد پر بجلی کی لوڈشیڈنگ کے خلاف کے الیکٹرک اور دیگر کو نوٹس جاری کردیا۔

سندھ ہائیکورٹ کے جسٹس فیصل کمال نے جماعت اسلامی کے 9 ٹاؤن چیئرمینز کی جانب سے لائن لاسز کی بنیاد پر لوڈشیڈنگ کے خلاف دائر درخواست پر سماعت کی۔دوران سماعت درخواست گزار کے وکیل نے عدالت میں مؤقف اپنایا کہ کے الیکٹرک اپنی لوڈشیڈنگ پالیسی کے برعکس 18 ،18 گھنٹے لوڈشیڈنگ کررہا ہے، نیپرا کو درخواست گزاروں نے شکایت کی تاحال شکایت پر فیصلہ نہیں کیا۔

اس پر جسٹس فیصل کمال نے ریمارکس دیے کہ لوڈشیڈنگ کس طرح ہورہی ہے، ہم یہاں رہتے ہیں سب سمجھتے ہیں،کے الیکٹرک شہر میں جو کچھ کررہا ہے ہم سب سمجھتے ہیں، شہریوں کی تکلیف کا اندازہ ہےمگر یہ کیس آئینی بینچ میں جانا چاہیے تھا۔درخواست گزار کے وکیل نے عدالت کو بتایا کہ ریگولربینچ پہلے بھی اس نوعیت کے کیسز سن چکی ہے، ڈیکلریشن چاہتے ہیں حکم نہیں، ناجائز لوڈ شیڈنگ پر نیپرا کو کے الیکٹرک کے خلاف ایکشن لینے کاحکم دیا جائے۔ بعد ازاں عدالت نے کے الیکٹرک اور دیگر کو نوٹس جاری کرتے ہوئے 25 جولائی کو نیپرا کے ریجنل ہیڈکو بھی طلب کرلیا۔