ایگری کلچر آفیسر/ پیسٹی سائیڈ انسپکٹر سمبڑیال صبا تحسین نے کہا ہے کہ کاشتکار گندم کو اسپرے کے بعد جڑی بوٹیوں کو چارے کے طور پر ہرگز استعمال نہ کریں۔ ۔
ان خیالات کا اظہار انہوں نے اپنے دفتر میں منگل کوقومی خبر رساں ادارے اے پی پی سے گفتگو کرتے ہوئے کیا
انہوں نے کہا ہے کہ کاشتکار زہریلی ادویات کے اسپرے کے بعد جڑی بوٹیوں کو چارے کے طور پر مویشیوں، جانوروں بالخصوص بکریوں، گائے، بھینسوں وغیرہ کو ڈالنے سے گریز کریں کیونکہ اسپرے کے زہریلے اثرات جہاں جڑی بوٹیوں کے ذریعے مذکورہ جانوروں کے پیٹ میں داخل ہو کر دودھ اور گوشت کی پیداوار کو بری طرح متاثر کرسکتے ہیں وہیں جانوروں اور مویشیوں کی زندگیوں کو بھی خطرات سے دوچار ہونا پڑ سکتا ہے، نیز زہر کے چھڑکائو کے بعد گوڈی یا بارہیرو کے استعمال سے بھی گریز کیاجائے تاکہ زہروں کا اثر دیر تک برقرار رکھنے میں مدد مل سکے۔
انہوں نے کہاکہ موجودہ حالات میں گندم سمیت دیگر زرعی اجناس کی بہتر پیداوار کا حصول اشدضروری ہے۔ انہوں نے کہاکہ اسپرے کے دوران انتہائی احتیاط سے کام لینا چاہیے اوراس دوران کوئی جگہ خالی نہیں رہنے دی جانی چاہیے۔ صبا تحسین نے کہاکہ گندم کے کھیت کے خالی کناروں پر بھی اگر اسپرے کر دیاجائے تو اس کے بھی بہترین نتائچ حاصل ہو سکتے ہیں۔ انہوں نے ریتلے اور کلراٹھے علاقوں میں ماہرین زراعت یا محکمہ زراعت کے فیلڈ اسٹاف کی مشاورت سے زہروں کا اسپرے کرنے کی بھی ہدایت کی ہے۔
تازہ ترین خبروں کے لیے پی این آئی کا فیس بک پیج فالو کریں
