پولیس گاڑی پر راکٹ حملہ

جنوبی وزیرستان(پی این آئی) جنوبی وزیرستان کے علاقے وانا میں رات گئے گاڑی پر راکٹ حملے میں سی ٹی ڈی پولیس اہلکار سمیت 3 افراد جاں بحق ہو گئے، باغیچہ سٹاپ کے مقام پر نامعلوم افراد نے فیلڈر گاڑی کو پہلے راکٹ سے نشانہ بنایا اس کے بعد فائرنگ کی، فائرنگ سے گاڑی میں سوار تین افراد جاں بحق ہوگئے۔

جاں بحق ہونے والوں میں دو عام شہری اور ایک پولیس اہلکار شامل ہے۔جاں بحق افراد میں مصطفیٰ، یونس اور پولیس اہلکار عثمان شامل ہیں۔ پولیس کے مطابق لاشوں کو پوسٹ مارٹم کیلئے وانا ہسپتال منتقل کردیا گیا۔ پولیس نے جائے وقوعہ پر پہنچ کر علاقے کو گھیرے میں لے لیا اور علاقے میں سرچ آپریشن کیا جبکہ واقعے مزید کی تحقیقات جاری ہیں۔خیال رہے کہ اس سے قبل خیبر پختونخواہ کے علاقے جنوبی وزیرستان میں سیکیورٹی فورسز کی کارروائی کے دوران 4 خوارج مارے گئے تھے۔

پاک فوج کے شعبہ تعلقات عامہ (آئی ایس پی آر) کے مطابق جنوبی وزیرستان میں سیکیورٹی فورسز نے خفیہ اطلاعات پر آپریشن کیاگیا تھا۔پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان کے علاقے دیو سالی میں خارجی احمد شاہ عرف انتظار مارا گیا جبکہ جنوبی وزیرستان کے علاقے خرمنگ میں سیکیورٹی فورسز نے افغانستان سے دراندازی کی کوشش ناکام بناتے ہوئے 5 خارجی دہشت گردوں کو ہلاک کردیا جبکہ 3 زخمی ہوگئے تھے۔