سیکیورٹی فورسز نے خیبرپختونخوا میں دو کامیاب کارروائیوں کے دوران بھارتی حمایت یافتہ فتنہ الخوارج سے تعلق رکھنے والے پانچ دہشت گردوں کو ہلاک کر دیا۔
پاک فوج کے شعبہ تعلقات عامہ کے مطابق سات اور آٹھ مئی دو ہزار چھبیس کی درمیانی شب ضلع ٹانک اور ڈیرہ اسماعیل خان میں خفیہ اطلاعات کی بنیاد پر انٹیلی جنس کارروائیاں کی گئیں۔ ان کارروائیوں میں ٹانک میں شدید فائرنگ کے تبادلے کے دوران چار دہشت گرد ہلاک ہوئے جبکہ ڈیرہ اسماعیل خان میں ایک دہشت گرد مارا گیا۔
ترجمان کے مطابق ہلاک دہشت گرد علاقے میں متعدد دہشت گرد کارروائیوں میں ملوث تھے۔ ان کے قبضے سے اسلحہ اور گولہ بارود بھی برآمد کیا گیا ہے۔
بیان میں کہا گیا ہے کہ علاقے میں مزید دہشت گردوں کی تلاش اور صفائی کا عمل جاری ہے اور سیکیورٹی فورسز ملک سے دہشت گردی کے مکمل خاتمے کے لیے کارروائیاں جاری رکھے ہوئے ہیں۔
وزیر اعظم شہباز شریف نے ان کارروائیوں پر سیکیورٹی فورسز کو خراج تحسین پیش کرتے ہوئے کہا کہ دہشت گردی کے خلاف جنگ میں پوری قوم افواج کے ساتھ کھڑی ہے اور اس کا مکمل خاتمہ قومی ترجیح ہے۔
وزیر داخلہ محسن نقوی نے بھی سیکیورٹی فورسز کی کارروائیوں کو سراہتے ہوئے کہا کہ دہشت گردی کے نیٹ ورک کے خاتمے تک کارروائیاں جاری رہیں گی۔
تازہ ترین خبروں کے لیے پی این آئی کا فیس بک پیج فالو کریں
