بولی ووڈ اداکارہ رشمیکا مندانا ایک فلم کی شوٹنگ کے دوران شدید زخمی ہو گئی ہیں جس کے بعد ڈاکٹروں نے انہیں چھ ہفتے مکمل آرام کا مشورہ دیا ہے۔ چوٹ کی شدت کے باعث ان کی آئندہ فلموں کی شوٹنگ کا کام بھی عارضی طور پر متاثر ہونے کا خدشہ ہے۔
بھارتی میڈیا رپورٹس کے مطابق ایک ڈانس سین کی شوٹنگ کے دوران اداکارہ کے کولہے کے پٹھے کا جوڑ مکمل طور پر الگ ہو گیا تھا، جس کی وجہ سے طبی ماہرین نے انہیں مسلسل چھ ہفتوں تک مکمل آرام اور بحالیِ صحت کی تھراپی کروانے کی سخت ہدایت کی ہے۔ اس چوٹ کی وجہ سے ان کی فلموں کی شوٹنگ فی الحال روک دی گئی ہے۔ بتایا جا رہا ہے کہ رشمیکا مندانا اپنی آنے والی نئی فلموں ’رن بالی‘ اور ’میسا‘ کے لیے مسلسل سخت قسم کے ایکشن اور ڈانس کے مناظر عکسبند کروا رہی تھیں، جس کے باعث ان کے جسم پر شدید دباؤ پڑا۔
طبی ماہرین نے اس قسم کی شدید چوٹ پر حیرت کا اظہار کرتے ہوئے کہا ہے کہ ایسی چوٹیں عام افراد میں کم ہی دیکھی جاتی ہیں اور عموماً صرف پیشہ ور کھلاڑی ہی اس کا شکار ہوتے ہیں، جس سے ظاہر ہوتا ہے کہ اداکارہ اپنی شوٹنگز کے دوران کس قدر شدید جسمانی تھکاوٹ اور دباؤ کا سامنا کر رہی تھیں۔ ڈاکٹروں نے انہیں باقاعدہ علاج اور تھراپی کروانے کی ہدایت کی ہے تاکہ ان کا پٹھا دوبارہ صحیح طریقے سے جڑ سکے اور وہ صحت یاب ہو کر کام پر واپس آ سکیں۔ طبی ماہرین کے مطابق اس پورے عرصے میں ان کی صحت پر مسلسل نظر رکھی جائے گی اور مکمل بحالی کے بعد ہی انہیں دوبارہ شوٹنگ شروع کرنے کی اجازت ملے گی۔
اداکارہ رشمیکا مندانا نے حال ہی میں اداکار وجے دیوراکونڈا سے شادی کی ہے اور شادی کے بعد انہوں نے اپنی فلم ’میسا‘ کی شوٹنگ کا دوبارہ آغاز کیا تھا۔ انہوں نے فلم کے سیٹ سے ایک جھلک بھی اپنے مداحوں کے ساتھ شیئر کی تھی جس میں وہ ایک بالکل مختلف اور نڈر کردار ادا کر رہی ہیں۔ اس فلم کی ہدایت کاری راویندر پولے کر رہے ہیں جبکہ اسے ان فارمولا فلمز پروڈیوس کر رہی ہے۔ اس کے علاوہ ان کی دوسری بڑی فلم ’رن بالی‘ کی ستمبر میں نمائش کی تیاری کی جا رہی تھی، جس میں وہ اپنے شوہر وجے دیوراکونڈا کے ساتھ مرکزی کردار میں نظر آئیں گی۔
