لوزیانا(پی این آئی) امریکی ریاست لوزیانا میں اتوار کی صبح تک جاری رہنے والے مقابلہ حسن میں مس یونیورس کا انتخاب کر لیا گیا ہے ، جس میں دنیا بھر سے 84 ممالک کی خوبرو خواتین نے حصہ لیا تھا ۔خبر رساں ادارے “ڈیلی میل “کے مطابق امریکا کی “آر بونی گیبریل “مس یونیورس کا تاج اپنے سر سجانے میں کامیاب ہوئی ہیں ، اس سے پہلے وہ مس امریکا بھی ہیں،
امریکی مؤقر جریدوں لائف سٹائل اور انسائیڈر کے مطابق وینزویلا کی امندا ڈوڈیمل فرسٹ رنر اپ اور مس ڈومینیکن ریپبلک اینڈرینا مارٹنیز فوونیر دوسری رنر کے طور پر منتخب ہوئیں۔ واضح رہے کہ 2021 کی مس یونیورس کا ٹائٹل بھارت کی “ہرناز کوور سندھو” کےپاس ہے اور انہوں نے ہی مس یونیورس 2022 کو تاج پہنایا ہے ، “آربونی گیبریل “کو پہنایا جانے والا تاج اس لحاظ سے منفرد اہمیت کا حامل تھا کہ اس سے قبل کسی بھی مس یونیورس کو منتخب ہونے کے بعد ایسا تاج نہیں پہنایا گیا ہے، تاج پر شاہی نیلم اور سفید ہیرے جڑے ہوئے تھے اور مالیت 5 ملین اور 750 ہزار ڈالرز تھی۔معوض جیولری ہاؤس کی جانب سے تیار کردہ نایاب تاج 110 قیراط کے نیلے نیلم اور 48 قیراط کے سفید ہیروں سے مزین ہے جس میں 45.14 قیراط کا نیلا شاہی نیلم سب سے اوپر پوری آب و تاب سے جگمگ کر رہا تھا، امریکی فیشن ڈیزائنر اور ماڈل آر بونی گیبریل نے جو مقابلہ جیتا ہے اس میں 85 ممالک نے شرکت کی تھی۔ٹیکساس میں پیدا ہونے والی نئی مس یونیورس 28 سال کی ہیں، ان کے والد فلپائن سے آنے والے تارک وطن ہیں جب کہ والدہ کا تعلق امریکی ریاست ٹیکساس سے ہے، یونیورسٹی آف نارتھ ٹیکساس سے گریجویٹ نئی مس یونیورس کے لیے فیشن ڈیزائنگ بہت اہم ہے جب کہ فارغ وقت میں وہ پینٹنگ، شاپنگ اور یوگا کرنا پسند کرتی ہیں۔
