پاکستان میں بجلی سبسڈی نظام میں بڑی تبدیلی کا فیصلہ

ذرائع کے مطابق موجودہ سبسڈی نظام میں بعض صارفین کی جانب سے ایک سے زائد میٹرز استعمال کر کے اپنی بجلی کی کھپت 200 یونٹس سے کم رکھنے کا رجحان پایا جاتا ہے، تاکہ وہ سبسڈی سے زیادہ فائدہ اٹھا سکیں۔ نئے نظام کے نفاذ کے بعد اس طرز عمل کی حوصلہ شکنی ہوگی۔

حکومت اس مقصد کیلئے نیشنل سوشیو اکنامک رجسٹری کو بجلی صارفین کے ڈیٹا کے ساتھ منسلک کرنے پر کام کر رہی ہے، جس میں عالمی بینک بھی تکنیکی معاونت فراہم کر رہا ہے۔ سبسڈی کی ادائیگی کیلئے ایک بیرونی ادارے کے ذریعے شفاف میکانزم بھی تیار کیا جا رہا ہے۔

توانائی اصلاحات کے ساتھ ساتھ حکومت دیگر شعبوں میں بھی پالیسی تبدیلیاں لا رہی ہے، جن میں پنجاب میں متعارف کردہ ای آبیانہ نظام کو دیگر صوبوں تک توسیع دینے کی تیاری شامل ہے۔ اس کے تحت آبپاشی کے پانی کے نرخوں کو آپریشن اور دیکھ بھال کے اخراجات کے مطابق ایڈجسٹ کیا جائے گا۔

ادھر پاکستان ریزیلینس اینڈ سسٹین ایبلٹی فیسلٹی کے تحت 20 کروڑ ڈالر کی دوسری قسط کے حصول کے قریب پہنچ گیا ہے، جس کی حتمی منظوری کیلئے آئی ایم ایف ایگزیکٹو بورڈ کا اجلاس 8 مئی 2026 کو واشنگٹن میں متوقع ہے۔