ضلع کرم (آئی این پی)ضلع کرم میں قبائلی عمائدین کے درمیان طے پانے والے امن معاہدے کے بعد 7 روز سے جاری جھڑپیں ختم ہو گئیں۔امن جرگے میں فریقین نے ایک سال تک فائر بندی معاہدے پر دستخط کیے ہیں۔وفاقی وزیر ساجد طوری کا اس حوالے سے کہنا ہے کہ کرم میں فائر بندی کا معاہدہ نیک شگون ہے، معاہدے کی خلاف ورزی پر 14 کروڑ روپے جرمانہ ہو گا۔
ساجد طوری کا کہنا ہے کہ معاہدے کے تحت اصل مجرموں تک پہنچنے میں آسانی ہو گی، جہاں واردات ہو گی مجرموں کا پتہ لگا کر کارروائی کی جائے گی۔خیال رہے کہ ضلع کرم میں 7 روز سے زمین کے تنازع پر دو قبائل کے درمیان جھڑپیں جاری تھیں، قبائلی جھڑپوں کے دوران فائرنگ کے واقعات میں 13 افراد جاں بحق اور 100 سے زائد افراد زخمی ہوئے۔ضلع کرم میں قبائلی تنازع کے بعد پیدا ہونے والی امن و امان کی خراب صورت حال کو کنٹرول کرنے کے لیے فوج اور ایف سی کو بھی طلب کیا گیا اور متنازع زمین پر دفعہ 144 نافذ کر دی گئی تھی۔
تازہ ترین خبروں کے لیے پی این آئی کا فیس بک پیج فالو کریں
