ایک لڑکی کو بازیاب کروانے کیلئے جانیوالی پولیس نے 151اغوا شدہ لڑکیاں بازیاب کروالیں، واقعہ کس شہر میں پیش آیا؟

لاہور(پی این آئی)پولیس نے سپریم کورٹ میں سرگودھا سے اغوا شدہ 151 لڑکیاں بازیاب کرانے کا دعویٰ کر دیا۔تفصیلات کےمطابق پیر کو جسٹس مقبول باقر کی سربراہی میں تین رکنی بنچ نے سرگودھا سے اغوا ہونے والی لڑکی ثوبیا بتول کی برآمدگی سے متعلق کیس کی سماعت کی۔ سپریم کورٹ میں سرگودھا سے اغوا ہونے والی ثوبیہ بتول کی برآمدگی سے متعلق کیس میں پنجاب کے ضلع سرگودھا سے اغواء شدہ 151 لڑکیاں بازیاب کرانے کا انکشاف ہوا۔

لڑکیوں کے اغواء اور بازیابی کا انکشاف ڈی پی او سرگودھا ڈاکٹر رضوان نے دورانِ سماعت کیا۔ عدالت نے بڑی تعداد میں لڑکیوں کے اغواء پر تشویش کا اظہار کیا ۔ ڈی پی او نے بتایا کہ عدالتی حکم پر کیے گئے آپریشن کے نتیجے میں سرگودھا ڈویژن کے مختلف علاقوں سے 151 لڑکیاں برآمد ہوئی ہیں۔ڈی پی او سرگودھا نے بتایا 21 لڑکیاں قباء خانوں سے برآمد ہوئی ہیں۔جسٹس مقبول باقر نے کہا کہ جو لڑکیاں برآمد ہوئیں کیا ان کی ایف آئی آرز درج تھیں ،اتنے چھوٹے سے علاقے سے 151 اغواء شدہ لڑکیاں برآمد ہوئیں۔ انہوں نے کہاکہ لڑکیوں کا اغواء ہونا پولیس کی نااہلی اور ناکامی ہے۔ ڈی پی او نے کہاکہ بچی ثوبیہ کی تلاش جاری ہے۔ جسٹس مقبول باقر نے کہاکہ جن تھانوں میں مقدمات درج کیے گئے تھے ان کے ایس ایچ اوز کو بھی نوٹس کرنا چاہیے تھا۔ڈی پی او سرگودھا نے کہا کہ عدالتی حکم پر اغواء شدہ لڑکیوں کو برآمد کرنے کیلئے اقدامات کر رہے ہیں۔ جسٹس مقبول باقر ٰنے کہا کہ یہ بہت زیادتی کی بات ہے، ایف آئی آر کے باوجود ریکوری میں اتنی سستی برتی گئی۔

ڈی پی او سرگودھا نے کہاکہ مختلف مقدمات میں ملوث 16 ملزمان کو گرفتار کر لیا ہے، بازیاب ہونے والیوں میں سے کچھ لڑکیوں نے نکاح نامے بھی دکھائے ہیں۔جسٹس مقبول باقر نے کہاکہ نکاح نامے تو بن بھی جاتے ہیں۔عدالت عظمیٰ نے آئی جی پنجاب کو صوبے بھر میں اغواء شدہ لڑکیوں کو برآمد کرنے کیلئے اقدامات کی ہدایت کی ،عدالت نے ثوبیہ بتول کی برآمدگی کیلئے بھی پولیس کو اقدامات اٹھانے کا حکم دے دیا ،عدالت نے ثوبیہ بتول کے اغواء کیس میں گرفتار ملزم عمیر کی درخواست ضمانت واپس لینے پر خارج کردی۔