رہنما تحریک انصاف شوکت یوسفزئی نے پارٹی قیادت سے لانگ مارچ ملتوی کرنے کا مطالبہ کر دیا۔
شوکت یوسفزئی نے چیئرمین پی ٹی آئی بیرسٹر گوہر کو لکھے گئے خط میں کہا کہ وفاقی حکومت بعض ایشوز کو بنیاد بنا کر خیبر پختونخوا میں ایمرجنسی نافذ کرنا چاہتی ہے، خدشہ ہے کہ وفاقی حکومت لانگ مارچ کے باعث صوبائی حکومت ختم کرنے کی طرف جا سکتی ہے، پارٹی کو ملک اور اپنے وسیع تر مفاد میں بہتر حکمت عملی وضع کرنا ہوگی۔
خط کے مطابق افغانستان کی جانب سے ممکنہ خطرے کو ایمرجنسی کے جواز کے طور پر استعمال کیا جا سکتا ہے، میری رائے میں پی ٹی آئی کو لانگ مارچ فوری طور پر ملتوی کر دینا چاہیے۔
شوکت یوسفزئی نے مزید لکھا کہ مطالبات سے پیچھے نہ ہٹا جائے مگر دہشت گردی کے پیش نظر احتجاج ملتوی کیا جائے، موجودہ حالات میں ٹھنڈے دماغ سے فیصلہ کرنا ہوگا، ٹکراؤ سے پارٹی، صوبائی حکومت اور کارکنوں کو نقصان پہنچنے کا خدشہ ہے، پارٹی کو مذاکرات کی راہ ہموار کر کے موجودہ صورتحال سے نکلنے کی حکمت عملی بنانی چاہیے۔
