کراچی کی مقامی عدالت نے قتل بالسبب کے مقدمے میں کوکین کوئین انمول عرف پنکی پر فردِ جرم عائد کردی۔
منگل کو ڈسٹرکٹ اینڈ سیشن عدالت جنوبی کراچی میں مقدمے کی سماعت ہوئی، جس کے دوران ملزمہ کو ویڈیو لنک کے ذریعے عدالت میں پیش کیا گیا۔ انمول عرف پنکی نے صحتِ جرم سے انکار کرتے ہوئے کہا کہ اس کے خلاف جھوٹا مقدمہ بنایا گیا ہے۔
عدالت نے استغاثہ کے گواہان کو نوٹس جاری کرتے ہوئے انہیں 3 ستمبر تک پیش کرنے کا حکم دیا اور فردِ جرم عائد کرنے کے بعد گواہوں کے بیانات ریکارڈ کرنے کے لیے سماعت ملتوی کردی۔
ملزمہ کے خلاف ابتدا میں بغدادی تھانے میں قتلِ خطا کا مقدمہ درج کیا گیا تھا، جس میں بعد ازاں ترمیم کرکے قتل بالسبب کی دفعہ شامل کی گئی۔ پولیس کے مطابق ایک نامعلوم شخص کی لاش ملی تھی اور اس کے پاس سے ایسی ڈبیا برآمد ہوئی جس پر انمول پنکی کا نام درج تھا۔ بعد ازاں کراچی یونیورسٹی کی کیمیکل رپورٹ میں موت نشے کے باعث قرار دی گئی، جس کے بعد قتل کی دفعہ تبدیل کردی گئی۔
واضح رہے کہ 13 اگست کو ایڈیشنل ڈسٹرکٹ اینڈ سیشن جج جنوبی نے منشیات کے تین مقدمات میں انمول پنکی کی بریت کی درخواستیں منظور کرتے ہوئے اسے تینوں مقدمات میں بری کردیا تھا۔ پراسیکیوشن ان مقدمات میں ملزمہ کے خلاف شواہد پیش کرنے میں ناکام رہی تھی۔
انمول عرف پنکی کو 12 مئی 2026 کو کراچی کے علاقے گارڈن سے پولیس اور ایک وفاقی حساس ادارے کی مشترکہ کارروائی میں گرفتار کیا گیا تھا۔ پولیس کے مطابق اس کے قبضے سے تقریباً ڈیڑھ کلو کوکین، 9 ایم ایم پستول اور کوکین کی تیاری میں استعمال ہونے والا کیمیکل برآمد ہوا تھا۔
پولیس کا کہنا ہے کہ انمول پنکی کے خلاف کراچی کے مختلف تھانوں میں 16 سے زائد مقدمات درج ہیں، جن میں منشیات فروشی، غیر قانونی اسلحہ، اقدامِ قتل اور قتل سمیت مختلف دفعات شامل رہی ہیں۔ تاہم مقدمات کی تعداد اور نوعیت سے متعلق مختلف اوقات میں سامنے آنے والے اعداد و شمار میں فرق بھی ریکارڈ پر موجود ہے۔
تفتیشی حکام کے مطابق ملزمہ کے خلاف درخشاں، گزری، بغدادی، گارڈن، بوٹ بیسن اور ڈیفنس تھانوں میں مقدمات درج رہے ہیں، جبکہ اس کے مبینہ منشیات نیٹ ورک اور سہولت کاروں سے متعلق تحقیقات بھی کی گئی ہیں۔
حکام کے مطابق انمول پنکی کے رابطوں، بینک لین دین اور مبینہ منشیات سپلائی نیٹ ورک کی بھی تحقیقات کی گئیں۔ پولیس نے اس کے مبینہ نیٹ ورک کے کراچی سے باہر تک پھیلے ہونے اور متعدد سہولت کاروں کے ملوث ہونے کا دعویٰ کیا ہے، تاہم ان الزامات کا حتمی تعین عدالتوں میں مقدمات کے فیصلوں سے ہوگا۔
تازہ عدالتی پیش رفت کے مطابق انمول پنکی کو ایک مقدمے میں بریت ملنے کے باوجود دیگر زیرِ سماعت مقدمات کا سامنا ہے، جن میں قتل بالسبب کا مقدمہ بھی شامل ہے۔
