راولپنڈی (آئی این پی )سربراہ عوامی مسلم لیگ اور سابق وزیر داخلہ شیخ رشید نے کاغذات نامزدگی مسترد ہونے پر سپریم کورٹ جانے کا اعلان کر دیا۔کاغذات نامزدگی مسترد ہونے پر جاری ویڈیو پیغام میں سربراہ عوامی مسلم لیگ شیخ رشید نے کہا کہ قابل احترام آر او نے آدھے گھنٹے کے نوٹس پر مجھے کمشنر آفس طلب کیا، میرے کاغذات کی سکروٹنی ہوئی، الزام لگا کہ میں نے مری ریسٹ ہائوس ٹھہرنے کے پیسے ادا نہیں کئے، میں آج تک مری کے ریسٹ ہائوس نہیں ٹھہرا۔انہوں نے کہا کہ جو الزام لگا اس کے پیسے دینے کیلئے تیار ہوں،
ایک زمین کے مچلکے کا الزام لگایا کہ ڈکلیئر نہیں کی، میری اپنی جو بھی زمین ہے میرے نام پر ہے، سپریم کورٹ نے زمین کے کاغذات کے معاملے میں میرے حق میں فیصلہ دیا۔شیخ رشید نے کہا کہ میرے اوپر ٹیکس چھپانے کا بھی الزام لگا، آج تک ٹیکس نہیں چھپایا، مجھے نااہلی قبول ہے، نااہل کیا جانا میرے لئے اعزاز ہے، میں اپیل کروں گا، سپریم کورٹ تک جائوں گا۔سابق وزیر داخلہ کا مزید کہنا تھا کہ میں کئی مرتبہ وزیر رہا، 94 ہزار کی کرپشن کیوں کروں گا، آج اپیل کروں گا کہ غیر ذمہ دارانہ الزام واپس لیں، میں ہائیکورٹ اور سپریم کورٹ تک جائوں گا، این اے 56 اور 57 سے قلم دوات جیتے گی۔
