اسلام آباد (پی این آئی) وزیر دفاع خواجہ آصف نے کہا کہ چیئرمین پاکستان تحریک انصاف عمران خان کی سوچ تبدیل ہوئی ہے ، اب وہ سیاسی بات کر رہے ہیں ، پاکستان تحریک انصاف سے بات ہونی چاہئے ۔
نجی ٹی وی کے پروگرام میں گفتگو کرتے ہوئے خواجہ آصف نے کہا کہ پاکستان تحریک انصاف سے گفتگو کسی ایک نقطے پر نہیں ہونی چاہئے یہ مفاد پرستی ہو گی ، اس کو گرینڈ نیشنل ڈائیلاگ کی شکل دینی چاہئے تاکہ تمام شراکت دار بیٹھ کر مسائل دیکھ سکیں جو الیکشن سے بھی بڑے ہیں جس میں معیشت سر فہرست ہے ۔خواجہ آصف نے کہا کہ راولپنڈی نیوٹرل ہو گیا ہے اسی طرح عدلیہ اور ایگزیکٹو کو بھی اپنے حدود میں رہنا ہوگا ، فوج نے ایک انیشیٹو لیا ہے تو باقیوں کو بھی حدود میں رہنا ہوگا ، اس ملک میں سب کی شراکت داری ہے ۔ بیٹھ کر سارے مسئلے حل ہو جائیں گے ، بنگلہ دیش میں روڈ میپ طے کیا گیا ہے ، یہاں پر بھی طے کیا جائے ۔خواجہ آصف نے کہا کہ کابل میں سفیر پر حملے کا مطلب ہے کہ حالات بہت خراب ہیں۔
ہم چاہتے ہیں افغانستان میں امن ہو ، افغانستان میں خلفشاف کا نقصان ہمیں بھی ہوگا ، ہماری دعا ہے کہ وہاں امن ہو ، ٹی ٹی پی جو بھی حملہ کرے گی اس کے تانے بانے افغانستان سے ملیں گے ، ناظم الامور پر حملے کے معاملے پر نیشنل ایکشن کمیٹی کا اجلاس طلب کیا جانا چاہئے ، شائد اجلاس اگلے ہفتے طلب کیا جا سکتا ہے ۔
